തിരുവനന്തപുരം : സംസ്ഥാനത്ത് അടുത്ത മൂന്ന് ദിവസങ്ങളില് ശക്തമായ മഴക്ക് സാധ്യതയുണ്ടെന്ന മുന്നറിയിപ്പുമായി കാലാവസ്ഥാ നിരീക്ഷണ കേന്ദ്രം. ഇന്ന് രാവിലെ മുതല് സംസ്ഥാനത്തിന്റെ വിവിധ ഭാഗങ്ങളില് ശക്തമായ മഴ തുടരുന്നത് കണക്കിലെടുത്ത് 8 ജില്ലകളില് യെല്ലോ അലേര്ട്ട് പ്രഖ്യാപിച്ചു. തിരുവനന്തപുരം, കൊല്ലം, കോട്ടയം, എറണാകുളം, ഇടുക്കി, മലപ്പുറം, കോഴിക്കോട്, വയനാട് എന്നീ ജില്ലകളിലാണ് ഇന്ന് യെല്ലോ അലേര്ട്ട് പ്രഖ്യാപിച്ചിരിക്കുന്നത്.
ഒപ്പം തന്നെ വിവിധ ജില്ലകളില് നാളെയും മറ്റന്നാളും ശക്തമായ മഴ തുടരാന് സാധ്യത ഉണ്ടെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കി. കോട്ടയം, എറണാകുളം, ഇടുക്കി, കോഴിക്കോട്, വയനാട് ജില്ലകളിലാണ് നാളെയും, മറ്റന്നാളും മഴ മുന്നറിയിപ്പ് നല്കിയിരിക്കുന്നത്.
മഴ മുന്നറിയിപ്പ് നല്കിയിരിക്കുന്ന ഇടങ്ങളിലെല്ലാം ഇടിമിന്നലോട് കൂടിയ മഴക്കാണ് സാധ്യത. അതിനാല് തന്നെ ആളുകള് കൂടുതല് ജാഗ്രത പാലിക്കണമെന്ന് അധികൃതർ നിർദേശം നൽകി. മല്സ്യത്തൊഴിലാളികള് കടലില് പോകുന്നതിന് തടസമുള്ളതായി അധികൃതര് ഇതുവരെ വ്യക്തമാക്കിയിട്ടില്ല.
Read also : കാസർഗോഡ്- മംഗളൂരു ബസ് സർവീസ് പുനരാരംഭിച്ചു
