തിരുവനന്തപുരം: കേരളാ കോണ്ഗ്രസ് – എം ജോസ് കെ. മാണി പക്ഷത്തെ തള്ളിപ്പറഞ്ഞ് പ്രതിപക്ഷ നേതാവ് രമേശ് ചെന്നിത്തല രംഗത്ത്. ജോസ് കെ. മാണി യുഡിഎഫിനോട് വിശ്വാസ വഞ്ചന കാണിച്ചെന്നും മുന്നണി സംവിധാനത്തിന് അച്ചടക്കം അനിവാര്യമാണെന്നും ചെന്നിത്തല പറഞ്ഞു.
മുന്നണിയെ വെല്ലുവിളിച്ചാണ് ജോസ് കെ. മാണി മുന്നോട്ട് പോയതെന്ന് ചെന്നിത്തല ആരോപിച്ചു. കോട്ടയം ജില്ലാ പഞ്ചായത്ത് പ്രസിഡന്റ് സ്ഥാനം മുതല് അദ്ദേഹം യുഡിഎഫിനെ വഞ്ചിക്കുകയാണ്. ഇങ്ങനെ ഉള്ളവരെ മുന്നണിക്കുള്ളില് ഉള്പ്പെടുത്താന് സാധിക്കില്ല. ചെന്നിത്തല വ്യക്തമാക്കി.
കെ. എം. മാണിയെ രാഷ്ട്രീയമായി തകര്ക്കാന് ശ്രമിച്ച എല്ഡിഎഫിനോടാണ് ജോസ് കെ. മാണി ഇപ്പോള് അടുപ്പം പുലര്ത്തുന്നതെന്നും ചെന്നിത്തല മാദ്ധ്യമങ്ങളോട് പറഞ്ഞു. കെ.എം. മാണി എല്ലാക്കാലത്തും യുഡിഎഫിനൊപ്പം നിലകൊണ്ടിരുന്ന നേതാവാണെന്നും അദ്ദേഹം പറഞ്ഞു.
സര്ക്കാരിനെതിരേയും ചെന്നിത്തല രൂക്ഷ വിമര്ശനം ഉന്നയിച്ചു. സംസ്ഥാനത്തിന്റെ ക്രമസമാധാന നില തകര്ന്നിരിക്കുക ആണെന്നും സര്ക്കാര് അഴിമതിയിലും തീവെട്ടിക്കൊള്ളയിലും മുങ്ങിത്താഴുകയാണെന്നും അദ്ദേഹം വിമര്ശിച്ചു. കൂടാതെ കോവിഡ് കാലത്ത് ജനജീവിതം കൂടുതല് ദുരിതത്തില് ആക്കിയിരിക്കുകയാണ് എന്നും ചെന്നിത്തല ആരോപിച്ചു.
അതേസമയം സര്ക്കാരിനെതിരെ പ്രതിഷേധം ശക്തമാക്കുന്നതിന്റെ ഭാഗമായി ഈ മാസം 22ന് സെക്രട്ടറിയേറ്റിന് മുന്നില് സത്യഗ്രഹ സമരം നടത്തുമെന്നും ചെന്നിത്തല അറിയിച്ചു.
