കൊച്ചി: സംസ്ഥാനത്ത് സ്വർണവില താഴോട്ട് തന്നെ. വ്യാഴാഴ്ച പവന് 320 രൂപ കുറഞ്ഞ് വില 35,480 രൂപയിൽ എത്തി. 4435 രൂപയാണ് ഗ്രാമിന്റെ വില. ഇതോടെ സ്വർണവില ആറുമാസത്തെ താഴ്ന്ന നിലവാരത്തിലേക്ക് കൂപ്പുകുത്തി. കഴിഞ്ഞ ദിവസം 35,800 രൂപയായിരുന്നു പവന്റെ വില.
2020 ജൂൺ 20ന് 35,400ൽ എത്തിയ സ്വർണവില പിന്നീട് തുടർച്ചയായി താഴോട്ട് പതിക്കുക ആയിരുന്നു. അതിനിടെ ഓഗസ്റ്റിൽ 42,000 നിലവാരത്തിലേക്ക് ഉയർന്നെങ്കിലും തുടർന്നുള്ള മാസങ്ങളിൽ വിലയിൽ വലിയ ചാഞ്ചാട്ടമാണുണ്ടായത്. ഏറ്റവും ഉയർന്ന നിലവാരത്തിൽ നിന്ന് വിലയിൽ 6520 രൂപയുടെ ഇടിവാണ് ഉണ്ടായത്.
ബോണ്ടിൽ നിന്നുള്ള ആദായം യുഎസിൽ വർധിച്ചതോടെ ആഗോള വിപണിയിൽ സ്വർണ വിലയിൽ ഇടിവുണ്ടായി. സ്പോട്ട് ഗോൾഡ് വില ഔൺസിന് 1,832.84 ഡോളർ നിലവാരത്തിലാണ്. മറ്റു കറൻസികളെ അപേക്ഷിച്ച് ഡോളർ കരുത്തുനേടിയതും സ്വർണ വിലയെ ബാധിച്ചു. ദേശീയ വിപണിയിലും വിലയിടിവ് പ്രകടമായി.
Read Also: മോദിക്ക് പിണറായി കത്ത് എഴുതിയതോടെ സ്വർണക്കടത്ത് അന്വേഷണം നിലച്ചു; ചെന്നിത്തല
