ഓപ്പറേഷൻ അഖാൽ; കുൽഗാമിൽ ഏറ്റുമുട്ടൽ, രണ്ട് സൈനികർ വീരമൃത്യു
കഴിഞ്ഞ ഒമ്പത് ദിവസമായി മേഖലയിൽ ഒളിച്ചിരിക്കുന്ന ഭീകരവാദികൾക്കായി ഓപ്പറേഷൻ അഖാൽ തുടരുകയാണ്. ഏറ്റുമുട്ടലിൽ ഇതുവരെ പത്ത് സൈനികർക്ക് പരിക്കേറ്റിട്ടുണ്ട്. അഞ്ച് ഭീകരവാദികളെ ഇതുവരെ സുരക്ഷാ സേന വധിച്ചു.
ശ്രീനഗർ: ജമ്മു കശ്‌മീരിലെ കുൽഗാം ജില്ലയിലുണ്ടായ ഏറ്റുമുട്ടലിൽ രണ്ട് സൈനികർ വീരമൃത്യു വരിച്ചു. ലാൻസ് നായിക പ്രിതിപാൽ സിങ്, ശിപായി ഹർമിന്ദർ സിങ് എന്നിവരാണ് വീരമൃത്യു വരിച്ചത്. ഓപ്പറേഷൻ അഖാലിന്റെ ഭാഗമായി മേഖലയിൽ ഇന്ന് ഏറ്റുമുട്ടൽ നടന്നിരുന്നു. രണ്ട് സൈനികർക്ക് പരിക്കേറ്റിട്ടുമുണ്ട്.
കഴിഞ്ഞ ഒമ്പത് ദിവസമായി മേഖലയിൽ ഒളിച്ചിരിക്കുന്ന ഭീകരവാദികൾക്കായി ഓപ്പറേഷൻ അഖാൽ തുടരുകയാണ്. ഏറ്റുമുട്ടലിൽ ഇതുവരെ പത്ത് സൈനികർക്ക് പരിക്കേറ്റിട്ടുണ്ട്. അഞ്ച് ഭീകരവാദികളെ ഇതുവരെ സുരക്ഷാ സേന വധിച്ചു. ഇതിൽ മൂന്നുപേർ പഹൽഗാം ഭീകരാക്രമണത്തിൽ നേരിട്ട് പങ്കെടുത്ത ഭീകരവാദികളായിരുന്നു.
ഓഗസ്‌റ്റ് ഒന്നിനാണ് ദക്ഷിണ കശ്‌മീരിലെ അഖാലിൽ സുരക്ഷാസേന ഭീകരവിരുദ്ധ ദൗത്യം ആരംഭിച്ചത്. സമീപകാലത്ത് നടന്ന ഏറ്റവും ദൈർഘ്യമേറിയ ഭീകരവിരുദ്ധ ദൗത്യമാണ് ഓപ്പറേഷൻ അഖാൽ. മൂന്ന് ഭീകരവാദികൾ കൂടി അഖാലിലെ വനമേഖലയിൽ ഒളിച്ചിരിക്കുന്നുണ്ടെന്ന് വിവരം കിട്ടിയതിന്റെ അടിസ്‌ഥാനത്തിലായിരുന്നു ഇന്നത്തെ ദൗത്യം.
പ്രദേശത്തെ സ്വാഭാവിക ഗുഹകളിലാണ് ഇവർ താവളമടിച്ചിരിക്കുന്നതെന്നാണ് സുരക്ഷാ സേന പറയുന്നത്. ദുർഘടമായ പ്രദേശമായതിനാൽ ഭീകരവാദികളെ പിടികൂടുക അത്ര എളുപ്പമല്ല. സൈന്യവും സിആർപിഎഫും ജമ്മു കശ്‌മീർ പോലീസും സംയുക്‌തമായാണ് ഭീകരവിരുദ്ധ ദൗത്യം നടത്തുന്നത്. അതേസമയം, വീരമൃത്യു വരിച്ചതിൽ അഗാധമായ ദുഃഖം രേഖപ്പെടുത്തി സൈന്യം ട്വീറ്റ് ചെയ്‌തു. ദൗത്യം തുടരുമെന്നും സൈന്യം വ്യക്‌തമാക്കി.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
