ഇടുക്കി: തദ്ദേശ തിരഞ്ഞെടുപ്പിലെ കനത്ത തോൽവിക്ക് പിന്നാലെ വോട്ടർമാരെ വിമർശിച്ച് നടത്തിയ വിവാദ പരാമർശത്തിൽ തിരുത്തുമായി സിപിഎം നേതാവും മുൻ മന്ത്രിയുമായ എംഎം മണി. തനിക്ക് തെറ്റ് പറ്റി. അങ്ങനെ പറയാൻ പാടില്ലായിരുന്നു. തെറ്റാണെന്ന് പാർട്ടി പറഞ്ഞതിനെ അംഗീകരിക്കുന്നുവെന്നും എംഎം മണി പറഞ്ഞു.
ഇന്നലെത്തെ സാഹചര്യത്തിൽ ഒരു വികാരത്തിന് പുറത്ത് പറഞ്ഞുപോയതാണ്. അത്തരം പരാമർശം വേണ്ടിയിരുന്നില്ല. കേരളത്തിലെ ജനങ്ങൾ നൽകിയ ഈ വിധിയോട് ഒരു നിലയിലും യോജിക്കാൻ സാധിക്കില്ലെന്ന് തന്നെയാണ് തന്റെ നിലപാടെന്നും അദ്ദേഹം പറഞ്ഞു. വോട്ടർമാരെ അധിക്ഷേപിച്ച് എംഎം മണി ഇന്നലെ നടത്തിയ പരാമർശം വിവാദമായിരുന്നു.
പെൻഷൻ വാങ്ങി ശാപ്പാട് കഴിച്ച് നൈമിഷികമായ വികാരത്തിനടിപ്പെട്ട് തങ്ങൾക്കെതിരായി വോട്ട് ചെയ്തു എന്നായിരുന്നു മണിയുടെ പ്രതികരണം. ഇടുക്കിയിൽ മാദ്ധ്യമങ്ങളോട് സംസാരിക്കുന്നതിനിടെ ആയിരുന്നു ജനങ്ങളെയും വോട്ടർമാരെയും അപമാനിക്കുന്ന തരത്തിലുള്ള എംഎം മണിയുടെ പ്രതികരണം. വിവാദമായതോടെ ഇന്ന് രാവിലെയാണ് പ്രസ്താവന തിരുത്തി മണി രംഗത്തെത്തിയത്.
”ഞാൻ അങ്ങനെയങ്ങ് പ്രതികരിച്ചുവെന്നേ ഉള്ളൂ. പെൻഷനും ഒരുപാട് വികസനവും ചെയ്തിട്ട് തിരഞ്ഞെടുപ്പിൽ അങ്ങനെയൊരു വിധി വന്നപ്പോൾ പ്രതികരിച്ചു. അത് തെറ്റാണെന്ന് ജനറൽ സെക്രട്ടറി അടക്കം പറഞ്ഞു. ജനറൽ സെക്രട്ടറി പറഞ്ഞതാണ് പാർട്ടി നിലപാട്. പാവപ്പെട്ട ആളുകൾക്ക് സഹായമൊന്നും ചെയ്യാത്ത ആൾക്കാരാണ് യുഡിഎഫ്.
ഇടതുപക്ഷ സർക്കാരുകൾ ചെയ്തിട്ടുള്ള ക്ഷേമ പ്രവർത്തനങ്ങൾ യുഡിഎഫ് സർക്കാരുകൾ ചെയ്തിട്ടില്ല. രാഷ്ട്രീയ പ്രവർത്തകർ സ്വർഗരാജ്യം കിട്ടാനാണോ പ്രവർത്തിക്കുന്നത് പാർട്ടിയുടെ കാഴ്ചപ്പാടിലാണ് ഞാൻ പ്രവർത്തിക്കുന്നത്. ആന്റണിയുടെയും ഉമ്മൻ ചാണ്ടിയുടെയും കരുണാകരന്റെയും സർക്കാരുകൾ എൽഡിഎഫ് സർക്കാരിന്റെ അത്ര ക്ഷേമ പ്രവർത്തനങ്ങളൊന്നും നടത്തിയിട്ടില്ല. അവരൊന്നും ചെയ്യാതിരുന്നിട്ട് നമ്മൾ നല്ല കാര്യങ്ങൾ ചെയ്യുമ്പോൾ എന്തെങ്കിലും ന്യായം പറഞ്ഞു നിൽക്കേണ്ടേ”- എംഎം മണി പറഞ്ഞു.
Most Read| റാമ്പിലെത്തിയാൽ അസുഖങ്ങളെല്ലാം മറക്കും; സഫ ഇപ്പോൾ താരമാണ്
