ന്യൂഡെൽഹി: ബിജെപി ദേശീയ അധ്യക്ഷനായി ചുമതലയേറ്റ് നിതിൻ നബിൻ. കേന്ദ്രമന്ത്രി ജെപി നദ്ദയ്ക്ക് പകരക്കാരനായാണ് നബിൻ എത്തുന്നത്. നദ്ദയുടെ കാലാവധി 2024ൽ അവസാനിച്ചിരുന്നു. എന്നാൽ, 2024ലെ ലോക്സഭാ തിരഞ്ഞെടുപ്പ് കണക്കിലെടുത്ത് കാലാവധി നീട്ടുകയായിരുന്നു.
പാർട്ടി പാർലമെന്ററി ബോർഡാണ് നിതിൻ നബിനെ ദേശീയ വർക്കിങ് പ്രസിഡണ്ടായി തിരഞ്ഞെടുത്തത്. പിന്നാലെ ദേശീയ പ്രസിഡണ്ടായി തിരഞ്ഞെടുക്കുകയായിരുന്നു. ബിജെപിയുടെ ദേശീയ അധ്യക്ഷനാകുന്ന ഏറ്റവും പ്രായം കുറഞ്ഞ വ്യക്തിയാണ് 45കാരനായ നിതിൻ. പാർട്ടിയുടെ ഭരണഘടന അനുസരിച്ച് മൂന്നുവർഷമാണ് കാലാവധി.
നിലവിൽ പട്നയിലെ ബാങ്കിപ്പൂർ മണ്ഡലത്തിൽ നിന്നുള്ള എംഎൽഎയും ബിഹാറിലെ പൊതുമരാമത്ത് വകുപ്പ് മന്ത്രിയുമാണ് നിതിൻ നബിൻ. അന്തരിച്ച ബിജെപി നേതാവ് നബിൻ കിഷോർ സിൻഹയുടെ മകനാണ്. ദേശീയതലത്തിൽ ബിജെപിയിലെ തലമുറ മാറ്റത്തിനുള്ള സൂചനയാണ് നിതിൻ നബിനിലൂടെ പാർട്ടി മുന്നോട്ട് വയ്ക്കുന്നത്.
ഈവർഷവും അടുത്തവർഷവും നടക്കാനിരിക്കുന്ന നിയമസഭാ തിരഞ്ഞെടുപ്പുകൾ മുന്നിൽക്കണ്ടാണ് നിതിന്റെ നിയമനം. എബിവിപിയിലൂടെയാണ് നിതിൻ രാഷ്ട്രീയത്തിലേക്ക് എത്തുന്നത്. അച്ഛന്റെ മരണശേഷം നടന്ന ഉപതിരഞ്ഞെടുപ്പിലൂടെ 2000ൽ ആണ് ആദ്യമായി തിരഞ്ഞെടുപ്പ് രാഷ്ട്രീയത്തിലേക്ക് പ്രവേശിച്ചത്. 2010 മുതൽ 2025 വരെ വിജയം ആവർത്തിച്ചു.
ഇക്കാലയളവിൽ നഗരവികസനം, അടിസ്ഥാന സൗകര്യവികസനം എന്നീ മേഖലകളിൽ വിവിധ വകുപ്പുകൾ കൈകാര്യം ചെയ്തു. ബിജെപിയിലൂടെ യുവജന വിഭാഗമായ യുവമോർച്ചയിൽ പ്രവർത്തിച്ചിട്ടുള്ള നിതിൻ നബിനെ ഛത്തീസ്ഗഡിലെ തിരഞ്ഞെടുപ്പ് ഉൾപ്പടെ നിരവധി പ്രധാനപ്പെട്ട തിരഞ്ഞെടുപ്പ് ചുമതലകളും നൽകിയിരുന്നു. ഇനി ബംഗാൾ, അസം, തമിഴ്നാട്, കേരള, പുതുച്ചേരി സംസ്ഥാനങ്ങളിലെ തിരഞ്ഞെടുപ്പ് ഒരുക്കങ്ങൾ നടത്തേണ്ട ചുമതല നിതിൻ നബിലിലേക്ക് എത്തുകയാണ്.
Most Read| ‘പ്രതിഷേധക്കാർ 72 മണിക്കൂറിനുള്ളിൽ കീഴടങ്ങണം’; അന്ത്യശാസനം നൽകി ഇറാൻ
