പാലക്കാട്: ഷൊർണൂർ- പാലക്കാട് റെയിൽവേ ട്രാക്കിൽ അപകടകരമായ രീതിയിൽ ഇരുമ്പ് ക്ളിപ്പുകൾ കയറ്റിവച്ച നിലയിൽ. ഒറ്റപ്പാലം, ലക്കിടി റെയിൽവേ സ്‌റ്റേഷനുകൾക്ക് മധ്യേ മായന്നൂർ മേൽപ്പാലത്തിന് സമീപമാണ് ക്ളിപ്പുകൾ കണ്ടെത്തിയത്. പാളത്തെയും കോൺക്രീറ്റ് സ്ളീപ്പറിനെയും ബന്ധിപ്പിക്കുന്ന അഞ്ച് ഇആർ ക്ളിപ്പുകൾ ആയിരുന്നു ട്രാക്കിന് മുകളിൽ.
പാലക്കാട് ഭാഗത്തേക്ക് ട്രെയിനുകൾ കടന്നുപോകുന്ന ട്രാക്കിന് മുകളിലായിരുന്നു ഇരുമ്പ് ക്ളിപ്പുകൾ. കഴിഞ്ഞദിവസം വൈകീട്ട് ആറോടെയാണ് സംഭവം. എറണാകുളം- പാലക്കാട് മെമുവിന്റെ ലോക്കോ പൈലറ്റാണ് പാളത്തിൽ അസ്വാഭാവികത അനുഭവപ്പെട്ടതായി റിപ്പോർട് ചെയ്‌തത്‌. പിന്നാലെയെത്തിയ നിലമ്പൂർ- പാലക്കാട് പാസഞ്ചർ വേഗം കുറച്ചാണ് കടത്തിവിട്ടത്.
തുടർന്ന് നടത്തിയ പരിശോധനയിലാണ് 5 ക്ളിപ്പുകൾ പാളത്തിന് മുകളിൽ വിവിധ ഭാഗങ്ങളിലായി കണ്ടെത്തിയത്. കട്ടിയുള്ള ഇരുമ്പായതിനാൽ അപകടസാധ്യത ഉണ്ടായിരുന്നുവെന്നാണ് വിലയിരുത്തൽ. ട്രെയിൻ അട്ടിമറി ലക്ഷ്യത്തോടെ ക്ളിപ്പുകൾ വെച്ചെന്ന കുറ്റത്തിന് ഒറ്റപ്പാലം പോലീസ് കേസെടുത്തു. അയഞ്ഞ് കിടന്നിരുന്ന ക്ളിപ്പുകൾ അഴിച്ചുമാറ്റി ട്രാക്കിൽ കയറ്റിവെച്ചതാണെന്നാണ് പോലീസിന്റെ നിഗമനം.
Most Read| മദ്യപിച്ചില്ല, ഊതിക്കലിൽ ‘ഫിറ്റാ’യി കെഎസ്ആർടിസി ഡ്രൈവർ; പ്രതി തേൻവരിക്ക!
