തിരുവനന്തപുരം: കോവിഡിനെതിരെ പ്രതിരോധം തീര്‍ക്കാന്‍ സജ്ജരായി കോവിഡ് ബ്രിഗേഡ്. കോവിഡ് പ്രതിരോധത്തിനായി പരിശീലനം പൂര്‍ത്തിയാക്കിയ കോവിഡ് ബ്രിഗേഡിന്റെ ആദ്യ സംഘമാണ് സേവനത്തിറങ്ങുന്നത്. കാസര്‍ഗോഡ് ജില്ലയിലെ കോവിഡ് പ്രതിരോധ പ്രവര്‍ത്തനങ്ങളാണ് ബ്രിഗേഡിന്റെ ആദ്യ ദൗത്യം. നാളെ രാവിലെ മുഖ്യമന്ത്രി പിണറായി വിജയന്‍ സംഘത്തെ യാത്രയാക്കും.
തിരുവനന്തപുരം മെഡിക്കല്‍ കോളജിന്റെ നേതൃത്വത്തില്‍ നടന്ന നാല് ദിവസത്തെ പരിശീലനം പൂര്‍ത്തിയാക്കിയ 26 സിഎഫ്എല്‍ടിസി കോവിഡ് ബ്രിഗേഡുമാരാണ് സംഘത്തിലുള്ളത്. നാളെ രാവിലെ 10 മണിക്ക് സെന്‍ട്രല്‍ സ്റ്റേഡിയത്തില്‍ വെച്ച് നടക്കുന്ന ചടങ്ങിലാണ് മുഖ്യമന്ത്രി പിണറായി വിജയന്‍ സംഘത്തെ യാത്രയാക്കുക. ആരോഗ്യ വകുപ്പ് മന്ത്രി കെ.കെ. ശൈലജ അധ്യക്ഷത വഹിക്കുന്ന ചടങ്ങ് പൂര്‍ണ്ണമായും കോവിഡ് പ്രോട്ടോകോള്‍ പാലിച്ചാണ് സംഘടിപ്പിച്ചിരിക്കുന്നത്.
സംഘത്തിലെ മുഴുവന്‍ അംഗങ്ങള്‍ക്കും സിഎഫ്എല്‍ടിസികളില്‍ നേരിട്ടുള്ള പരിശീലനമാണ് നല്‍കിയത്. ഡോ. എസ്.എസ്. സന്തോഷ് കുമാറാണ് നാല് ദിവസത്തെ പരിശീലനത്തിന് നേതൃത്വം നല്‍കിയത്. ഇന്‍ഫെക്ഷന്‍ കണ്‍ട്രോള്‍, ബേസിക് ലൈഫ് സപ്പോര്‍ട്ട്, എയര്‍വേ മാനേജ്‌മെന്റ്, അഡ്വാന്‍സ്ഡ് എയര്‍വേ മാനേജ്‌മെന്റ്, മെഡിക്കല്‍ പ്രോട്ടോകോള്‍,കോവിഡ് പ്രോട്ടോകോള്‍, സാമ്പിള്‍ ടെസ്റ്റിംഗ്, സുരക്ഷാ മാനദണ്ഡങ്ങള്‍, പിപിഇ കിറ്റിന്റെ ഫലപ്രദമായ ഉപയോഗം തുടങ്ങിവയിലാണ് ഇവര്‍ പരിശീലനം സിദ്ധിച്ചിരിക്കുന്നത്.
സെപ്റ്റംബര്‍ മാസത്തോടെ സംസ്ഥാനത്ത് കോവിഡ് വ്യാപനം കൂടുമെന്ന വിദഗ്ധാഭിപ്രായത്തെ തുടര്‍ന്നാണ് ബ്രിഗേഡിന് രൂപം നല്‍കിയത്. വൈറസ് വ്യാപനം കുറച്ചു കൊണ്ടുവരുന്നതോടോപ്പം ആരോഗ്യ സംവിധാനങ്ങളും മനുഷ്യ വിഭവശേഷിയും വര്‍ധിപ്പിക്കേണ്ടതും അത്യാവശ്യമാണ്. ഡോക്ടര്‍മാരുടെയും മറ്റ് ആരോഗ്യ പ്രവര്‍ത്തകരുടെയും സേവനവും കൂടുതലായി ആവശ്യമുണ്ട്. ഫസ്റ്റ് ലൈന്‍ ട്രീറ്റ്‌മെന്റ് സെന്ററില്‍ ആവശ്യമായ ഡോക്ടര്‍മാര്‍, നഴ്‌സുമാര്‍, ഫാര്‍മസിസ്റ്റ്, ലബോറട്ടറി ടെക്‌നീഷ്യന്‍, മറ്റ് ആരോഗ്യ പ്രവര്‍ത്തകര്‍ തുടങ്ങി വിവിധ വിഭാഗങ്ങളില്‍ ഉള്‍പ്പെടുന്നവരാണ് കോവിഡ് ബ്രിഗേഡിലെ അംഗങ്ങള്‍.
കോവിഡ് 19 ജാഗ്രത പോര്‍ട്ടല്‍ വഴി കോവിഡ് ബ്രിഗേഡില്‍ രജിസ്റ്റര്‍ ചെയ്ത സേവന തത്പരരാണ് ബ്രിഗേഡില്‍ അംഗങ്ങളായിരിക്കുന്നത്. അടുത്ത ബാച്ചിന്റെ പരിശീലനം മെഡിക്കല്‍ കോളജില്‍ ആരംഭിച്ചു കഴിഞ്ഞു. ബ്രിഗേഡില്‍ ചേരാന്‍ https://covid19jagratha.kerala.nic.in/ എന്ന പോര്‍ട്ടല്‍ വഴി ഓണ്‍ലൈന്‍ രജിസ്‌ട്രേഷന്‍ നടത്താവുന്നതാണ്. തീവ്രപരിചരണ വിഭാഗങ്ങളില്‍ ജോലി ചെയ്യുന്നവര്‍ക്ക് ഐസിയുവില്‍ നേരിട്ടുള്ള 10 ദിവസത്തെ പരിശീലനമാണ് നല്‍കുന്നത്.
