മഞ്ഞുകാലത്തും മറ്റും മിക്കവരും നേരിടുന്ന പ്രശ്‌നമാണ് ചുണ്ടുകൾ വരണ്ട് പൊട്ടുന്നത്. ചുണ്ടുകളിലെ ചർമം വളരെ സെൻസിറ്റീവ് ആയതിനാൽ തന്നെ ഈർപ്പം അധിക നേരം നിലനിൽക്കില്ല. എന്നാൽ ചുണ്ടുകൾ വരണ്ട് പൊട്ടുന്നത് തടയാൻ സഹായിക്കുന്ന ചില പൊടിക്കൈകൾ പരിചയപ്പെടാം.
- തേനും പഞ്ചസാരയും
വരണ്ടതും വിണ്ടുകീറിയതുമായ ചുണ്ടുകൾക്ക് തേനും പഞ്ചസാരയും ഉപയോഗിക്കുന്നത് നല്ലതാണ്. ആന്റി ഓക്‌സിഡന്റുകളാൽ സമ്പന്നമായ ഇവ അൾട്രാവയലറ്റ് രശ്‌മികളിൽ നിന്ന് സംരക്ഷണമേകുന്നു. ഒരു സ്‌പൂൺ തേനിൽ അര ടീസ്‌പൂൺ പഞ്ചസാരയും ചേർത്ത് മിക്‌സ് ചെയ്‌ത്‌ ചുണ്ടുകളിൽ പുരട്ടുക. ശേഷം 5 മുതൽ 10 മിനിറ്റ് വരെ ചുണ്ടുകളിൽ മൃദുവായി സ്‌ക്രബ് ചെയ്യുക. തുടർന്ന് ചെറുചൂടുള്ള വെള്ളത്തിൽ കഴുകി കളയുക.
- വെളിച്ചെണ്ണ
വരണ്ട ചർമത്തിൽ നിന്ന് രക്ഷനേടാൻ വെളിച്ചെണ്ണ ഉത്തമമാണ്. വെളിച്ചെണ്ണയിൽ ആരോഗ്യകരമായ ഫാറ്റി ആസിഡുകൾ അടങ്ങിയിട്ടുണ്ട്. ഇത് ചുണ്ടുകളെ മൃദുവും പിങ്ക് നിറവുമാക്കാൻ സഹായിക്കുന്നു.
- പാൽപാട
ചുണ്ടുകളുടെ വരൾച്ച തടയാൻ പാൽപാട ഉപയോഗിക്കാം. പാൽ പാട പുരട്ടുന്നതിലൂടെ ചുണ്ടുകളിൽ ഈർപ്പം നിലനിൽക്കുകയും വരണ്ട് പൊട്ടുന്നത് തടയുകയും ചെയ്യും.
- റോസ് ഇതളുകൾ
റോസ് ഇതളുകൾ അൽപം പാലിനൊപ്പം മിക്‌സ് ചെയ്‌ത്‌ ചുണ്ടിൽ പുരട്ടുക. റോസ് ഇതളുകളിൽ വിറ്റാമിൻ ഇ അടങ്ങിയിട്ടുണ്ട്. ഇത് ചുണ്ടുകൾക്ക് പോഷണം നൽകുകയും അവയെ പുനരുജ്‌ജീവിപ്പിക്കുകയും ചെയ്യുന്നു. കൂടാതെ പാൽ ചർമത്തിലെ മൃതകോശങ്ങളെ നീക്കം ചെയ്യുന്നു.
- കറ്റാർവാഴ ജെൽ
കറ്റാർവാഴ ജെൽ ചുണ്ടുകളിലെ തിളക്കമുള്ളതും മിനുസമാർന്നതുമായ ചർമത്തെ സംരക്ഷിക്കുകയും വരണ്ട ചർമത്തെ ഇല്ലാതാക്കുകയും ചെയ്യുന്നു. രാത്രി ഉറങ്ങുന്നതിന് മുമ്പ് അൽപം കറ്റാർവാഴ ജെൽ ചുണ്ടിൽ പുരട്ടുക. തുടർന്ന് രാവിലെ തണുത്ത വെള്ളത്തിൽ കഴുകി കളയുക.
- നാരങ്ങ
നാരങ്ങ വിറ്റാമിൻ സിയാൽ സമ്പന്നമാണ്. ഇത് വരണ്ടതും ഇരുണ്ടതുമായ ചുണ്ടുകൾക്ക് ഫലപ്രദമാണ്. പ്രകൃതിദത്ത ബ്‌ളീച്ചായും ഇത് പ്രവർത്തിക്കുന്നു. നാരങ്ങാ നീരിൽ ആവണക്കെണ്ണ മിക്‌സ് ചെയ്‌ത്‌ ചുണ്ടിൽ പുരട്ടുന്നത് ചുണ്ടുകൾക്ക് പിങ്ക് നിറം ലഭിക്കാൻ സഹായിക്കും. ഈ മിശ്രിതം പുരട്ടി 10 മിനിറ്റിന് ശേഷം തണുത്ത വെള്ളത്തിൽ കഴുകി കളയാം.
(ഓർക്കുക: ആരോഗ്യ സംബന്ധമായ വാർത്തകളിൽ പറയുന്ന കാര്യങ്ങൾ അംഗീകൃത ആരോഗ്യ വിദഗ്‌ധരുടെ അഭിപ്രായം തേടാതെ സ്വയം ചെയ്യാൻ പാടുള്ളതല്ല.)
Most Read: ‘റോളക്‌സ് സർ പ്രൊമോ’ എത്തി; ടീസർ ആഘോഷമാക്കി ആരാധകർ
