ടെഹ്റാൻ: പ്രതിഷേധക്കാരെ തൂക്കിലേറ്റിയാൽ യുഎസ് ഇടപെടുമെന്ന പ്രസിഡണ്ട് ഡൊണാൾഡ് ട്രംപിന്റെ പ്രസ്താവനയ്ക്ക് പിന്നാലെ, ഭരണകൂടവിരുദ്ധ പ്രക്ഷോഭങ്ങളുടെ പേരിൽ അറസ്റ്റിലായ ഇർഫാൻ സോൾട്ടാനിയുടെ (26) വധശിക്ഷ റദ്ദാക്കി ഇറാൻ.
രാജ്യത്തിന്റെ ആഭ്യന്തര സുരക്ഷയ്ക്കും ഭരണകൂടത്തിനെതിരായ പ്രചാരണത്തിനും നീക്കം നടത്തിയെന്നാണ് ഇർഫാനെതിരെ ചുമത്തിയ കുറ്റം. കോടതി ശിക്ഷിച്ചാൽ പോലും ഇത്തരം കുറ്റങ്ങൾക്ക് വധശിക്ഷയില്ലെന്നാണ് ഇറാന്റെ പുതിയ വിശദീകരണം. അറസ്റ്റിലായ പ്രതിഷേധക്കാർക്ക് വധശിക്ഷ നൽകിയാൽ അമേരിക്ക ശക്തമായ നടപടി സ്വീകരിക്കുമെന്ന് ട്രംപ് മുന്നറിയിപ്പ് നൽകിയിരുന്നു.
ജനുവരി പത്തിന് നടന്ന പ്രതിഷേധത്തിൽ പങ്കെടുത്തതിനാണ് ഇർഫാൻ സോൾട്ടാനിയെ ഇറാൻ ഭരണകൂടം അറസ്റ്റ് ചെയ്തത്. പിന്നാലെ 14ന് വധശിക്ഷ നടപ്പാക്കുമെന്ന് അധികൃതർ അറിയിക്കുകയായിരുന്നു. എന്നാൽ, ഇന്നലെ നാടകീയമായി വധശിക്ഷ മാറ്റിവച്ചതായും, ഇന്ന് ഇർഫാന് വധശിക്ഷ ലഭിക്കാവുന്ന കുറ്റം ചുമത്തിയിട്ടില്ലാത്തതിനാൽ വധശിക്ഷയില്ലെന്നും അറിയിക്കുകയായിരുന്നു.
പ്രതിഷേധത്തെ അടിച്ചമർത്തുന്നതിനെതിരെ ഇറാനിയൻ ജനതയുടെ സഹായത്തിന് എത്തുന്നതിനെക്കുറിച്ച് ട്രംപ് കഴിഞ്ഞ ദിവസങ്ങളിൽ ആവർത്തിച്ച് സംസാരിച്ചിരുന്നു. ആവശ്യമെങ്കിൽ സൈനിക നടപടി ഉണ്ടാകുമെന്ന സൂചനയും നൽകിയിരുന്നു. ഇനി വധശിക്ഷ നടപ്പാക്കില്ലെന്ന് ഇറാൻ അറിയിച്ചതായും ട്രംപ് അവകാശപ്പെട്ടു.
Most Read| ആരോഗ്യപ്രശ്നം നേരിടുന്ന സഞ്ചാരിയുമായി ക്രൂ-11 സംഘം ഭൂമിയിലിറങ്ങി; ചരിത്രത്തിലാദ്യം
