മലപ്പുറം: പരപ്പനങ്ങാടിയിൽ ലഹരി ഉപയോഗം സംബന്ധിച്ച വാക്കുതർക്കം സംഘർഷത്തിൽ കലാശിച്ചു. ആലുങ്ങൽ ബീച്ചിൽ ഇന്നലെ രാത്രി എട്ടുമണിക്ക് ശേഷമാണ് സംഭവം. ഇവിടെ ലഹരി ഉപയോഗിക്കുന്നതായി ആരോപണമുള്ള ഒരാൾ നാട്ടുകാരുടെ നിരീക്ഷണത്തിലായിരുന്നു.
ഇത് സംബന്ധിച്ചുള്ള അന്വേഷണവും വിവരങ്ങൾ ചോദിച്ചറിഞ്ഞതുമാണ് നാട്ടുകാരും യുവാവിനെ അനുകൂലിക്കുന്നവരും തമ്മിൽ തർക്കമുണ്ടാക്കിയത്. ഇത് സംഘർഷത്തിൽ കലാശിക്കുകയായിരുന്നു. സംഘർഷത്തിൽ ഒട്ടേറെപ്പേർക്ക് പരിക്കേറ്റു. ഉടൻ സ്ഥലത്തെത്തിയ പോലീസ് സമാധാന ശ്രമങ്ങൾ നടത്തുകയും തടിച്ചുകൂടിയ ആളുകളെ മാറ്റുകയും ചെയ്യുകയായിരുന്നു.
ഇന്നലെ രാവിലെ ഇവിടെ നേരിയ വാക്കുതർക്കമുണ്ടായിരുന്നു. ഇതിന്റെ തുടർച്ചയായിരുന്നു രാത്രിയിലെ സംഘർഷം. സ്ഥലത്ത് രാത്രി വൈകിയും പോലീസ് കാവൽ ഏർപ്പെടുത്തിയിരുന്നു. നാട്ടുകാരായ കെസി ഷാജഹാൻ, എപി ഉമ്മർ, വിപി ഫൈസൽ, എംപി ബഷീർ, വിപി ഫിറോസ്, ആർപി യൂസഫ് എന്നിവർക്കാണ് കാര്യമായി പരിക്കേറ്റത്. ഇവർ തിരൂരങ്ങാടി ഗവ. താലൂക്ക് ആശുപത്രിയിൽ ചികിൽസയിലാണ്.
Most Read| രണ്ടാം ഭാര്യയുടെ പ്രേതത്തെ പേടി, 36 വർഷമായി സ്ത്രീ വേഷം കെട്ടി ജീവിക്കുന്ന പുരുഷൻ
