ദുബായ്: കുട്ടികളില് ഉമിനീര് ശേഖരിച്ചുള്ള കോവിഡ് പരിശോധനക്ക് ദുബായ് ഹെല്ത്ത് അതോറിറ്റി (ഡിഎച്ച്എ) അനുമതി നല്കി. മൂന്നു മുതല് 16 വയസു വരെയുള്ള കുട്ടികള്ക്കായി ഉമിനീര് അടിസ്ഥാനമാക്കി കോവിഡ് പരിശോധന നടത്താനാണ് ഡിഎച്ച്എ അനുമതി നല്കിയത്. ദുബായില് നിലവിലുള്ള പിസിആര് ടെസ്റ്റിന് തുല്യമായ രീതിയാണ് ഉമിനീര് അടിസ്ഥാനമാക്കിയുള്ള പരിശോധന.
മൂക്കില് നിന്ന് സ്രവം ശേഖരിച്ചുള്ള പരിശോധന കുട്ടികളില് അസ്വസ്ഥത ഉണ്ടാക്കുന്നുവെന്ന റിപ്പോര്ട്ടിനെ തുടര്ന്നാണ് ഉമിനീര് ശേഖരിച്ചു പരിശോധന നടത്താന് അനുമതി നല്കിയത്. കൂടാതെ മുഹമ്മദ് ബിന് റാഷിദ് യൂണിവേഴ്സിറ്റി ഓഫ് മെഡിസിന് ആന്റ് ഹെല്ത്ത് സയന്സസ് (എംബിആര്യു), ഡിഎച്ച്എ എന്നിവ സംയുക്തമായി നടത്തിയ പഠനത്തില് കുട്ടികളിലെ ഉമിനീര് അടിസ്ഥാനമാക്കിയുള്ള പരിശോധനക്ക് കൂടുതല് കൃത്യതയുണ്ടെന്ന് വ്യക്തമാവുകയും ചെയ്തിരുന്നു. 24 മണിക്കൂറിനുള്ളില് പരിശോധന ഫലം ലഭിക്കുന്ന ഈ കോവിഡ് ടെസ്റ്റിന് 2500 രൂപയാണ് ഈടാക്കുന്നത്.
ഗവേഷണ സംഘം 476 കുട്ടികളില് നിന്ന് ഉമിനീര്, മൂക്കിലെ സ്രവം എന്നിവ ശേഖരിച്ചാണ് പരിശോധന ഫലങ്ങളിലെ കൃത്യത പരിശോധിച്ചത്. തുടര്ന്ന് 87 മുതല് 98 ശതമാനം വരെ കൃത്യത ഉറപ്പു വരുത്തുന്നതാണ് ഉമിനീര് അടിസ്ഥാനമാക്കിയുള്ള പരിശോധന ഫലമെന്ന് പഠനത്തില് വ്യക്തമായി. ഉമിനീര് പരിശോധനക്കുള്ള പോസിറ്റീവ് പ്രവചന മൂല്യം 92.2 ശതമാനവും നെഗറ്റീവ് പ്രവചന മൂല്യം 97.6 ശതമാനവുമാണ്. മാത്രവുമല്ല കുട്ടികളില് കോവിഡ്-19 സ്ക്രീനിംഗിന് ഉപയോഗപ്രദമായ ഡയഗ്നോസ്റ്റിക് മാതൃകയാണ് ഉമിനീരെന്ന് പരീക്ഷണ ഫലങ്ങള് കാണിക്കുന്നതായി ഡിഎച്ച്എ കൂട്ടിച്ചേര്ത്തു.
ഡിഎച്ച്എയുടെ ക്ളിനിക്കല് സപ്പോര്ട്ട് സര്വീസസ് ആന്റ് നഴ്സിംഗ് സെക്ടര് സിഇഒ ഡോ. ഫരീദ അല് ഖജ ഈ രീതി കുട്ടികളില് കോവിഡ് പരിശോധന അനായാസമാക്കാന് സഹായിക്കുമെന്ന് വ്യക്തമാക്കി. കൂടാതെ കോവിഡിനെതിരെ പോരാടുന്നതിനുള്ള ദുബായ് ഭരണകൂടത്തിന്റെ ശ്രമങ്ങള് ഗവേഷണ-തെളിവുകളുടെ അടിസ്ഥാനത്തിലാണ് എന്നതില് അഭിമാനിക്കുന്നതായി പഠനത്തിന്റെ ലീഡ് ഇന്വെസ്റ്റിഗേറ്ററും എംബിആര്യു കോളേജ് ഓഫ് മെഡിസിന് ഫാമിലി മെഡിസിന് അസിസ്റ്റന്റ് പ്രൊഫസറുമായ ഡോ. ഹനന് അല് സുവൈദിയും കൂട്ടിച്ചേര്ത്തു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
