ഇടുക്കി: മറയൂരിൽ കാട്ടാന ആക്രമണത്തിൽ ഒരാൾ മരിച്ചു. മറയൂർ ചമ്പക്കാട്ടിൽ വിമൽ (57) ആണ് മരിച്ചത്. ചിന്നാർ വന്യജീവി സങ്കേതത്തിന് അകത്താണ് സംഭവം. ഇന്ന് രാവിലെയാണ് സംഭവം നടന്നത്. വിമലിനെ ഉടൻ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.
വനം വകുപ്പിന്റെ പാമ്പാർ ലോഗ് ഹൗസിലേക്കുള്ള വഴി വെട്ടിത്തെളിക്കുന്നതിനായി എത്തിയതായിരുന്നു വിമൽ അടങ്ങുന്ന ഒമ്പതംഗ സംഘം. രണ്ട് സ്ത്രീകളും സംഘത്തിൽ ഉണ്ടായിരുന്നു. സംഘം നടന്നു പോകുന്നതിനിടെയാണ് ആനയുടെ ആക്രമണമുണ്ടായത്. കൂട്ടത്തിൽ ഏറ്റവും പിന്നിലായിട്ടാണ് വിമൽ ഉണ്ടായിരുന്നത്.
ആനയുടെ മുന്നിൽപ്പെട്ട വിമലിന് രക്ഷപ്പെടാനായില്ലെന്നാണ് കൂടെയുണ്ടായവർ പറയുന്നത്. ആന തുമ്പിക്കൈ കൊണ്ട് എടുത്തെറിയുകയും നിലത്തടിക്കുകയും ചെയ്തു. ഗുരുതരമായി പരിക്കേറ്റ വിമലിനെ വനംവകുപ്പിന്റെ വാഹനത്തിൽ ആശുപത്രിയിൽ എത്തിച്ചിരുന്നെങ്കിലും ജീവൻ രക്ഷിക്കാനായില്ല.
Most Read| ട്രാൻസ്ജെൻഡർ അത്ലീറ്റുകൾക്ക് വനിതാ കായിക ഇനങ്ങളിൽ നിരോധനം; ഉത്തരവിറക്കി ട്രംപ്
