കൊച്ചി: ഇൻഡേൻ ഗ്യാസ് എൽപിജി റീഫിൽ ബുക്കിങ്ങിന് രാജ്യത്തുടനീളം ഇനി ഒരു പൊതുനമ്പർ. 77 189 55 555 എന്ന നമ്പറാണ് ബുക്കിങ്ങിനായി ഉപയോഗിക്കേണ്ടത്. ഈ മാസം 31ന് അർധരാത്രിയോടെ ഇത് പ്രാബല്യത്തിൽ വരും. ഉപഭോക്താക്കൾക്ക് 24 മണിക്കൂറും ബുക്കിങ് സേവനം ലഭ്യമാകും. കൂടാതെ ഈ നമ്പറിൽ തന്നെ എസ്എംഎസ്, ഐവിആർഎസ് വഴിയുള്ള ബുക്കിങ്ങും എളുപ്പമാകും.
ഉപഭോക്താക്കൾ ഏത് സംസ്ഥാനത്തായാലും, ഒരു ടെലികോം പരിധിയിൽ നിന്നും മറ്റൊന്നിലേക്ക് മാറിയാലും ബുക്കിങ് നമ്പർ മാറില്ല. ഉപഭോക്താവിന്റെ രജിസ്റ്റർ ചെയ്തിരിക്കുന്ന മൊബൈൽ നമ്പർ ഉപയോഗിച്ച് മാത്രമേ ബുക്കിങ് സാധ്യമാകുകയുള്ളു.
മൊബൈൽ നമ്പർ രജിസ്റ്റർ ചെയ്തിട്ടുണ്ടെങ്കിൽ ഐവിആർഎസ് 16 അക്ക ഉപഭോക്തൃ ഐഡി ആവശ്യപ്പെടും. ഈ നമ്പർ എൽപിജി ഇൻവോയ്സുകൾ, ക്യാഷ് മെമോകൾ, സബ്സ്ക്രിപ്ഷൻ വൗച്ചർ എന്നിവയിൽ ഉണ്ടാകും. ഉപഭോക്താവ് ഈ നമ്പർ സ്ഥിരീകരിച്ചാൽ ഗ്യാസ് റീഫിൽ ബുക്കിങ് സ്വീകരിക്കും.
Read also: ചെലവ് ചുരുക്കൽ ലക്ഷ്യം; ശാഖകൾ ലയിപ്പിക്കാൻ യെസ് ബാങ്ക്
രജിസ്റ്റർ ചെയ്ത മൊബൈൽ നമ്പർ ഇൻഡേൻ റെക്കോഡുകളിൽ ലഭ്യമല്ലെങ്കിൽ, ഉപഭോക്തൃ ഐഡി നൽകി മൊബൈൽ നമ്പർ ഒറ്റത്തവണ രജിസ്റ്റർ ചെയ്യണം. നമ്പർ സ്ഥിരീകരിച്ചാൽ റീഫിൽ ബുക്കിങ് സ്വീകരിക്കും.
