മലപ്പുറം: ഗാസയിൽ ഇസ്രയേൽ നടത്തുന്ന ക്രൂരമായ വ്യോമാക്രമണത്തിൽ ദുരിതത്തിലായ പലസ്‌തീന്‍ ജനതയെ സംരക്ഷിക്കാന്‍ ഇന്ത്യ ശക്‌തമായി ഇടപെടണമെന്ന് മുസ്‌ലിം ലീഗ്. ചെറിയ പെരുന്നാൾ ദിനമായ ഇന്ന് പാണക്കാട് സയ്യിദ് ഹൈദരലി ശിഹാബ് തങ്ങളുടെ വീട്ടിൽ മുസ്‌ലിം ലീഗ് ദേശീയ കമ്മറ്റിയുടെ നേതൃത്വത്തിൽ പലസ്‌തീന്‍ ജനതക്ക് ‘ഐക്യദാർഢ്യം’ ചടങ്ങ് സംഘടിപ്പിച്ചു.
പാണക്കാട് സയ്യിദ് ഹൈദരലി ശിഹാബ് തങ്ങളും പികെ കുഞ്ഞാലിക്കുട്ടിയും അടക്കമുള്ള നേതാക്കൾ പ്ളക്കാഡുമേന്തി പലസ്‌തീന്‍ ജനതക്ക് ഐക്യദാര്‍ഢ്യം പ്രഖ്യാപിച്ചു. പലസ്‌തീന്‍ ജനതയെ കൊന്നൊടുക്കുന്ന ഇസ്രയേല്‍ നിലപാടിൽ പ്രതിഷേധിച്ച് മുസ്‌ലിം ലീഗിന്റെ നേതൃത്വത്തില്‍ രാജ്യവ്യാപകമായി വീടുകളില്‍ പ്രവര്‍ത്തകര്‍ പലസ്‌തീന്‍ ഐക്യദാര്‍ഢ്യത്തില്‍ പങ്കുചേരുകയാണെന്ന് പികെ കുഞ്ഞാലിക്കുട്ടി പ്രതികരിച്ചു.
മുന്‍കാല സര്‍ക്കാരുകള്‍ സ്വീകരിച്ച് പോരുന്ന പലസ്‌തീന്‍ അനുകൂല നിലപാടില്‍ നിന്ന് ഇന്ത്യ പിന്നോട്ട് പോവുകയാണെന്നും ഇത് രാജ്യത്തിന്റെ പരമ്പരാഗത നിലപാടിന് എതിരാണെന്നും നേതാക്കള്‍ ആരോപിച്ചു. ഇത്തരം തെറ്റായ നയങ്ങള്‍ കേന്ദ്ര സര്‍ക്കാര്‍ തിരുത്തണമെന്നും പികെ കുഞ്ഞാലിക്കുട്ടി ആവശ്യപ്പെട്ടു.
Also Read: ഇന്ത്യക്ക് കുവൈറ്റിന്റെ സഹായം; 100 മെട്രിക് ടൺ ഓക്‌സിജൻ മംഗളൂരുവിൽ എത്തി
