കോട്ടയം: നിലമ്പൂർ എംഎൽഎ പിവി അൻവർ കോൺഗ്രസിലേക്കെന്ന് സൂചന. ഇതിനായി നീക്കം നടത്തുന്നതായാണ് റിപ്പോർട്. നിയമസഭാ തിരഞ്ഞെടുപ്പിന് മുന്നേ തന്റെ പഴയ പാർട്ടിയിലേക്ക് എത്താനാണ് അൻവർ ശ്രമിക്കുന്നതെന്നാണ് വിവരം. കെപിസിസി അധ്യക്ഷൻ കെ സുധാകരന്റെ പിന്തുണയോടെയാണ് അൻവറിന്റെ നീക്കം.
ഡെൽഹിയിൽ ദേശീയ നേതൃത്വവുമായി അൻവർ ചർച്ച നടത്തി. കെസി വേണുഗോപാലുമായി അൻവർ കൂടിക്കാഴ്‌ച നടത്തിയെന്നാണ് റിപ്പോർട്ടുകൾ. അതേസമയം, അൻവറിന്റെ കോൺഗ്രസിലേക്കുള്ള വരവിനെ എതിർക്കുന്ന പ്രതിപക്ഷ നേതാവ് വിഡി സതീശന്റെയും മറ്റുചില നേതാക്കളുടെ നിലപാട് നിർണായകമാകും.
അൻവറിനെ യുഡിഎഫിൽ എടുക്കുന്നതിനോട് നേരത്തെ ലീഗ് നേതൃത്വം അനുകൂല സമീപനമല്ല സ്വീകരിച്ചിരുന്നത്. എന്നാൽ, ലീഗ് മയപ്പെടുമെന്നാണ് അൻവറിന്റെ വരവിനെ സ്വാഗതം ചെയ്യുന്ന കോൺഗ്രസ് നേതാക്കൾ കരുതുന്നത്. കെ സുധാകരനുമായി അൻവർ നേരത്തെ കൂടിക്കാഴ്‌ച നടത്തിയിരുന്നു.
ഡിഎംകെ തള്ളിയതോടെ അൻവർ തൃണമൂൽ കോൺഗ്രസുമായും എസ്‌പിയുമായും ചർച്ച നടത്തിയിരുന്നു. ഉപതിരഞ്ഞെടുപ്പിൽ ചേലക്കരയിൽ സ്‌ഥാനാർഥിയെ നിർത്തിയ അൻവർ പാലക്കാടും വയനാടും യുഡിഎഫിനെ പിന്തുണയ്‌ക്കുകയായിരുന്നു.
Most Read| യുവാവിന്റെ ഫോൺ അടിച്ചുമാറ്റി കുരങ്ങൻ; കോൾ വന്നപ്പോൾ അറ്റൻഡ് ചെയ്‌തു
