ന്യൂഡെല്ഹി: രാഹുല് ഗാന്ധിയുടെ നേതൃത്വത്തില് കോണ്ഗ്രസ് എംപിമാര് രാഷ്ട്രപതി ഭവനിലേക്ക് നടത്താനിരുന്ന മാര്ച്ചിന് ഡെല്ഹി പോലീസ് അനുമതി നിഷേധിച്ചു. കോണ്ഗ്രസ് ആസ്ഥാനത്തിന് സമീപം 144 പ്രഖ്യാപിച്ചിട്ടുമുണ്ട്. രാഷ്ട്രപതി ഭവനിലേക്ക് മാര്ച്ച് നടത്തി കേന്ദ്രസര്ക്കാര് പാസാക്കിയ കാര്ഷിക നിയമങ്ങള് പിന്വലിക്കാന് നിവേദനം നല്കാനാണ് എംപിമാര് തീരുമാനിച്ചിരുന്നത്.
എന്നാല് ഇപ്പോള് മൂന്ന് നേതാക്കള്ക്ക് മാത്രമാണ് രാഷ്ട്രപതി ഭവനിലേക്ക് പോകാന് അനുമതി നല്കിയത്. ഇന്ന് രാവിലെ 10.30നാണ് രാഹുല് ഗാന്ധിയുടെ നേതൃത്വത്തില് കോണ്ഗ്രസ് എംപിമാര് രാഷ്ട്രപതി ഭവനിലേക്ക് മാര്ച്ച് നടത്താനിരുന്നത്. വിജയ് ചൗക്കില് നിന്ന് രാഷ്ട്രപതി ഭവനിലേക്ക് മാര്ച്ച് നടത്തി രാഷ്ട്രപതിയെ കണ്ട്, രണ്ട് കോടി ആളുകള് ഒപ്പിട്ട നിവേദനം നല്കാനായിരുന്നു തീരുമാനം.
എഐസിസി ആസ്ഥാനത്ത് നിന്ന് രണ്ട് ബസുകളിലായി രാഹുല് ഗാന്ധിയുടെ നേതൃത്വത്തിലുള്ള സംഘം വിജയ് ചൗക്കിലേക്കെത്തി, ഇവിടെ നിന്ന് രാഷ്ട്രപതി ഭവനിലേക്ക് മാര്ച്ച് നടത്താനായിരുന്നു പദ്ധതി. രാജ്യത്തിന്റെ വിവിധ ഭാഗങ്ങളില് നിന്ന് കോണ്ഗ്രസ് എംപിമാര് മാര്ച്ചില് പങ്കെടുക്കാനായി ഡെല്ഹിയിലെത്തിയിട്ടുണ്ട്.
Also Read: ശബരിമലയില് കൂടുതല് പേരെ പ്രവേശിപ്പിക്കുന്നതിന് എതിരെ കേരളം സുപ്രീം കോടതിയില്
