തിരുവനന്തപുരം: പോളിയോ പ്രതിരോധ തുള്ളിമരുന്ന് വിതരണത്തിന്റെ സംസ്ഥാനതല ഉൽഘാടനം ഫെബ്രുവരി 27ആം തീയതി ഞായറാഴ്ച രാവിലെ 8 മണിക്ക് പത്തനംതിട്ട കോഴഞ്ചേരി ജില്ലാ ആശുപത്രിയില് വച്ച് ആരോഗ്യവകുപ്പ് മന്ത്രി വീണാ ജോര്ജ് നിര്വഹിക്കും. ഇതുകൂടാതെ സംസ്ഥാനത്തെ വിവിധ ജില്ലകളിലും ജില്ലാതല ഉൽഘാടനങ്ങൾ നടക്കുകയും ചെയ്യും.
പോളിയോ ബൂത്തുകളില് എത്തി തന്നെ എല്ലാ കുട്ടികള്ക്കും വാക്സിന് നല്കണമെന്ന് മന്ത്രി വീണ ജോര്ജ് പറഞ്ഞു. ഒഴിവാക്കാനാകാത്ത സാഹചര്യം കൊണ്ട് ബൂത്തുകളില് എത്തിച്ചേരാന് കഴിയാത്ത കുട്ടികള്ക്ക് തിങ്കള്, ചൊവ്വ ദിവസങ്ങളില് ആരോഗ്യ പ്രവര്ത്തകര് വീട്ടിലെത്തി പോളിയോ തുള്ളിമരുന്ന് നല്കുന്നതാണ്. സംസ്ഥാനത്ത് പോളിയോ തുള്ളിമരുന്ന് വിതരണം ചെയ്യുന്നതിനായുള്ള ക്രമീകരണങ്ങള് ഇതിനോടകം പൂര്ത്തിയായി കഴിഞ്ഞു.
24,614 ബൂത്തുകള് വഴി അഞ്ച് വയസ് വരെയുള്ള 24,36,298 കുട്ടികള്ക്കാണ് പോളിയോ തുള്ളിമരുന്ന് നല്കുന്നത്. ഇതിനായുള്ള ജീവനക്കാരേയും സന്നദ്ധ പ്രവര്ത്തകരേയും അതാത് കേന്ദ്രങ്ങളില് വിന്യസിച്ചിട്ടുണ്ട്. കോവിഡ് ബാധിച്ച കുട്ടികളാണെങ്കില് നാലാഴ്ച കഴിഞ്ഞ് പോളിയോ തുള്ളിമരുന്ന് നല്കിയാല് മതിയെന്നും മന്ത്രി വ്യക്തമാക്കി.
രാവിലെ 8 മണി മുതല് വൈകിട്ട് 5 മണി വരെയാണ് പോളിയോ ബൂത്തുകളുടെ പ്രവര്ത്തന സമയം. ബസ് സ്റ്റാന്റുകള്, റെയില്വേ സ്റ്റേഷനുകള്, വിമാനത്താവളങ്ങള് എന്നിവിടങ്ങളിലെ ട്രാന്സിറ്റ് ബൂത്തുകള് രാവിലെ 8 മണി മുതല് രാത്രി 8 മണിവരെ പ്രവര്ത്തിക്കും. പോളിയോ ബൂത്തിലുള്ളവരും കുട്ടികളെ കൊണ്ടുവരുന്നവരും കോവിഡ് മാര്ഗ നിര്ദ്ദേശങ്ങള് കര്ശനമായി പാലിക്കണം. തിരക്ക് ഒഴിവാക്കുവാനായി ആരോഗ്യ പ്രവര്ത്തകര് നിര്ദ്ദേശിക്കുന്ന സമയത്ത് കുട്ടികളെ കൊണ്ടുപോയി തുള്ളിമരുന്ന് നല്കേണ്ടതാണ്.
കേരളത്തില് 2000ത്തിന് ശേഷം പോളിയോ രോഗം റിപ്പോര്ട് ചെയ്തിട്ടില്ല. പക്ഷേ അയല് രാജ്യങ്ങളില് ഇപ്പോഴും പോളിയോ രോഗം റിപ്പോര്ട് ചെയ്യുന്നതിനാല് രോഗസാധ്യത ഒഴിവാക്കുന്നതിനാണ് പോളിയോ തുള്ളിമരുന്ന് നല്കുന്നത്. പോളിയോ രോഗം കാരണം കുട്ടികളിലുണ്ടാകുന്ന അംഗവൈകല്യം തടയേണ്ടത് അനിവാര്യമാണ്. അതിനാല് തന്നെ 5 വയസിൽ താഴെയുള്ള എല്ലാ കുട്ടികള്ക്കും പോളിയോ തുള്ളിമരുന്ന് നല്കണമെന്നും മന്ത്രി അഭ്യര്ഥിച്ചു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
