കൊച്ചി: അഭിപ്രായ സ്വാതന്ത്ര്യത്തെ ദുരുപയോഗം ചെയ്യുന്ന ചിലര് അവര്ക്ക് താല്പര്യം ഇല്ലാത്ത വ്യക്തികളെ കുറിച്ച് സോഷ്യല് മീഡിയയില് എന്തും പറയുന്ന സ്ഥിതിയാണ് ഇപ്പോള് കണ്ട് വരുന്നതെന്ന് മഞ്ജു വാര്യര്. സ്ത്രീകള്ക്കെതിരെ നടക്കുന്ന സൈബര് ആക്രമണങ്ങള്ക്ക് എതിരെയുള്ള ഡബ്ല്യു.സി.സിയുടെ ‘റെഫ്യൂസ് ദ അബ്യൂസ് സൈബര് ഇടം ഞങ്ങളുടെയും ഇടം’ എന്ന ക്യാമ്പയിനിന്റെ ഭാഗമായുള്ള വീഡിയോയിലാണ് മഞ്ജു വാര്യര് പ്രതികരിച്ചത്.
‘ലോകത്തിലെ ഏറ്റവും വലിയ ജനാധിപത്യ രാജ്യമായ നമ്മുടെ രാജ്യത്തിന്റെ ഏറ്റവും വലിയ പ്രത്യേകത അഭിപ്രായ സ്വാതന്ത്രമാണ്. എന്നാല് ഈ അഭിപ്രായ സ്വാതന്ത്ര്യം എവിടം വരെ എന്നൊരു ചോദ്യമുണ്ട്. ചിലരെങ്കിലും അവര്ക്ക് വിയോജിപ്പുള്ള ആരെ വേണമെങ്കിലും വ്യക്തിപരമായി അധിക്ഷേപിക്കാനും അസഭ്യം പറയാനുമുള്ള ഒരു അവകാശമായി ഇതിനെ കണക്കാക്കുന്നുണ്ട്. ഈ ഒരു ആക്രമണം കൂടുതലും നേരിടുന്നത് സ്ത്രീകളാണ് എന്നത് ആര്ക്കും നിഷേധിക്കാന് ആവാത്ത സത്യമാണ്. ഇങ്ങനെ ചെയ്യുന്നവരോട് ഭൂരിപക്ഷം ആളുകളും പ്രതികരിക്കാറുമില്ല. അതു തന്നെയാണ് അവരെ വീണ്ടും വീണ്ടും ഇങ്ങനെ ചെയ്യാന് പ്രേരിപ്പിക്കുന്നത്. ഇത് തടഞ്ഞേ പറ്റൂ. നമ്മളെല്ലാവരും ആണ് പെണ് വ്യത്യാസമില്ലാതെ ഒരു സമൂഹമായി ഒറ്റക്കെട്ടായി ഇതിനെതിരെ നിന്നേ പറ്റൂ,’ മഞ്ജു വാര്യര് പറഞ്ഞു.
നേരത്തെ നടിമാരായ നിമിഷ സജയന്, സാനിയ ഇയ്യപ്പന്, അന്ന ബെന്, ടെലിവിഷന് അവതാരകയായ രഞ്ജിനി ഹരിദാസ് തുടങ്ങിയവര് റെഫ്യൂസ് ദ അബ്യൂസ് ക്യാംമ്പയിനിന്റെ ഭാഗമായിരുന്നു.
View this post on Instagram
Read also: പോലീസ് ഉദ്യോഗസ്ഥരുടെ പേരില് തട്ടിപ്പ്; പിന്നില് ഉത്തരേന്ത്യന് സംഘം തന്നെ
