കാബൂൾ: പാക്കിസ്ഥാൻ ഫീൽഡ് മാർഷൽ അസിം മുനീറിനെ വെല്ലുവിളിച്ച് പാക്ക് താലിബാൻ. സൈനികരെ അയക്കുന്നതിന് പകരം ധൈര്യമുണ്ടെങ്കിൽ നേരിട്ട് യുദ്ധക്കളത്തിലിറങ്ങി നേരിടാനാണ് തെഹ്രികെ താലിബാൻ പാക്കിസ്ഥാന്റെ (ടിടിപി) കമാൻഡർ അസിം മുനീറിനെ വെല്ലുവിളിച്ചത്.
പാക്ക് താലിബാൻ ഉന്നത കമാൻഡറായ കാസിം ആണ് വെല്ലുവിളി നടത്തിയത്. പാക്കിസ്ഥാനും അഫ്ഗാനിസ്ഥാനും തമ്മിലുള്ള സംഘർഷം വർധിച്ചുവരുന്നതിനിടെയാണ് വെല്ലുവിളി. കഴിയുമെങ്കിൽ അഫ്ഗാൻ താലിബാനെ നേരിടണമെന്നും, അമ്മയുടെ പാൽ കുടിച്ചിട്ടുണ്ടെങ്കിൽ ധൈര്യം കാണിക്കണമെന്നും ടിടിപി വെല്ലുവിളിച്ചു.
ഈമാസം എട്ടിന് പാക്കിസ്ഥാനിലെ ഖൈബർ പഖ്തൂൺ പ്രവിശ്യയിലെ കുറാം ജില്ലയിൽ നടന്ന അക്രമണത്തിൽ 22 പാക്കിസ്ഥാൻ സൈനികർ കൊല്ലപ്പെടുകയും അവരുടെ ആയുധങ്ങൾ ടിടിപി പിടിച്ചെടുക്കുകയും ചെയ്തിരുന്നു. പിന്നാലെ ടിടിപി കമാൻഡർ കാസിമിനെ പിടികൂടുന്നവർക്കായി പാക്കിസ്ഥാൻ പത്തുകോടി പാരിതോഷികം പ്രഖ്യാപിക്കുകയും ചെയ്തു.
വെടിനിർത്തലിന് സമ്മതിച്ച പാക്കിസ്ഥാൻ, എന്നാൽ ടിടിപി അടക്കമുള്ള സായുധ ഗ്രൂപ്പുകളെ അഫ്ഗാൻ മണ്ണിൽ നിന്ന് പ്രവർത്തിക്കുന്നതിൽ വിലക്കിയാൽ മാത്രമേ വെടിനിർത്തൽ നിലനിൽക്കൂ എന്നും അറിയിച്ചിരുന്നു. ടിടിപിയുടെ നീക്കങ്ങൾക്ക് പാക്കിസ്ഥാനിലെ മറ്റ് സായുധ സംഘങ്ങളുടെ പിന്തുണ ഉണ്ടെന്നാണ് റിപ്പോർട്.
Most Read| ആസിയാൻ ഉച്ചകോടി; വെർച്വലായി പങ്കെടുക്കാൻ പ്രധാനമന്ത്രി
