തിരുവനന്തപുരം: കോവിഡ് പശ്ചാത്തലത്തില്‍ കെഎസ്ഇബി ഓഫീസുകളിലെ തിരക്ക് ഒഴിവാക്കാന്‍ വെര്‍ച്വല്‍ ക്യൂ സംവിധാനം ഒരുങ്ങി. ഓഫീസ് സന്ദര്‍ശനത്തിനുള്ള ടോക്കണ്‍ ‘ഇ-സമയം’ (esamayam.kseb.in) എന്ന വെബ്സൈറ്റിലൂടെയാണ് ബുക്ക് ചെയ്യേണ്ടതെന്ന് അധികൃതര്‍ അറിയിച്ചു.
വെബ്‌സൈറ്റില്‍ ഫോണ്‍ നമ്പര്‍ നല്‍കിയാല്‍ ലഭിക്കുന്ന ഒടിപി ഉപയോഗിച്ച് ലോഗിന്‍ ചെയ്യുകയും പേരും മറ്റ് വിവരങ്ങളും നല്‍കുകയും ചെയ്യണം. തുടര്‍ന്ന് സന്ദര്‍ശിക്കേണ്ട ഓഫീസിന്റെ പേരും ഉദ്യോഗസ്ഥന്റെ പേരും സമയവും സന്ദര്‍ശത്തിന്റെ ഉദ്ദേശ്യവും തെരഞ്ഞെടുക്കണം. വൈകാതെ ഉപഭോക്താക്കള്‍ക്ക് എസ്എംഎസായി ടോക്കണ്‍ നമ്പരും സമയവും ലഭിക്കും.
വെള്ളയമ്പലം, കേശവദാസപുരം എന്നീ രണ്ട് സെക്ഷന്‍ ഓഫീസുകളിലാണ് പരീക്ഷണ അടിസ്ഥാനത്തില്‍ ഇപ്പോള്‍ ഓണ്‍ലൈന്‍ ടോക്കണ്‍ സംവിധാനം നിലവില്‍ വന്നിരിക്കുന്നത്. വൈകാതെ ഈ സൗകര്യം എല്ലാ ഓഫീസുകളിലേക്കും ലഭ്യമാവും.
Read Also: ‘രണ്ടാമൂഴം’ വിവാദം ഒത്തുതീര്‍ന്നു
