തിരുവനന്തപുരം : സംസ്ഥാനത്ത് വാട്സ്ആപ്പിലൂടെ വര്ക്ക് ഫ്രം ഹോം തട്ടിപ്പുകള് വ്യാപകമാകുന്നതായി വ്യക്തമാക്കി കേരള പോലീസ്. കോവിഡ് നിലനില്ക്കുന്ന സാഹചര്യത്തില് ജോലി നഷ്ടമായ ആളുകളെ ലക്ഷ്യമാക്കിയാണ് തട്ടിപ്പുകള് വ്യാപകമാകുന്നത്. സംസ്ഥാനത്ത് ഇതിനോടകം തന്നെ നിരവധി പേർ വഞ്ചിതരായ ഈ തട്ടിപ്പില് ഇരയാകാതെ സൂക്ഷിക്കണമെന്ന മുന്നറിയിപ്പുമായാണ് കേരള പോലീസ് രംഗത്തെത്തിയത്. കേരള പോലീസിന്റെ ഫേസ്ബുക്ക് അക്കൗണ്ടിലൂടെയാണ് ഇക്കാര്യം വ്യക്തമാക്കിയത്.
‘There is a part-time job, you can use your mobile phone to operate at home, you can earn 200-3000 rupees a day, 10-30 minutes a day, new users join to get you 50 rupees, waiting for you to join. Reply 1 and long click the link to join us asap.’ ഇത്തരത്തിലുള്ള സന്ദേശങ്ങളാണ് ഇപ്പോള് വാട്സ്ആപ്പിലൂടെ പ്രചരിപ്പിക്കുന്നത്. വീട്ടിലിരുന്ന് പ്രതിദിനം 30 മിനിറ്റ് മാത്രം ജോലി ചെയ്താൽ 3000 രൂപ വരെ നേടാന് സാധിക്കുമെന്ന് വാഗ്ദാനം നല്കികൊണ്ട് വരുന്ന ഇത്തരം സന്ദേശങ്ങളില് വഞ്ചിതരാകരുതെന്നാണ് പോലീസ് മുന്നറിയിപ്പ് നല്കുന്നത്. ഇത്തരം സന്ദേശങ്ങള്ക്കൊപ്പം ഒരു ലിങ്ക് കൂടി ഉണ്ടാകും. ഈ ലിങ്ക് ഓപ്പണ് ചെയ്യുന്നതോടെ നമ്മുടെ വിവരങ്ങളും, കോണ്ടാക്റ്റുകളും, പണവും ഉൾപ്പടെ തട്ടിപ്പുകാര്ക്ക് സ്വന്തമാക്കാന് സാധിക്കും.
ഇത്തരത്തിലുള്ള ഓണ്ലൈന് തട്ടിപ്പുകളെ തടയുന്നതിനായി വാട്സ്ആപ്പ് തന്നെ നിരവധി സെക്യൂരിറ്റി നടപടികള് സ്വീകരിക്കുന്നുണ്ടെങ്കിലും, അവയെ വെല്ലുന്ന തരത്തിലുള്ള തട്ടിപ്പുകളാണ് ഇപ്പോള് നടക്കുന്നത്. പല കമ്പനികളുടെയും പേരിലാണ് ഇത്തരം മെസേജുകള് ആളുകള്ക്ക് ലഭിക്കുന്നത്. എന്നാല് ഈ മെസേജുകളുടെ കൃത്യമായ ഉറവിടങ്ങള് അവയായിരിക്കില്ല. അതിനാല് തന്നെ ഇത്തരത്തിലുള്ള മെസേജുകള് ലഭിക്കുന്ന സാഹചര്യത്തില് ലിങ്ക് ഓപ്പണ് ചെയ്യുന്നതിന് മുന്പായി അവയുടെ ആധികാരികത ഉറപ്പ് വരുത്തണമെന്ന് പോലീസ് വ്യക്തമാക്കുന്നുണ്ട്. ഒപ്പം തന്നെ തട്ടിപ്പുകള് സംശയിക്കുന്ന സാഹചര്യത്തില് ആ നമ്പര് ബ്ളോക്ക് ചെയ്ത് അടുത്തുള്ള പോലീസ് സ്റ്റേഷനിലോ, സൈബര് സ്റ്റേഷനിലോ പരാതി നല്കണമെന്നും കേരള പോലീസ് വ്യക്തമാക്കി.
Read also : ബംഗാളില് കോണ്ഗ്രസ് ഇടത്തേക്ക്; നിയമസഭാ തിരഞ്ഞെടുപ്പില് ഇടതിനൊപ്പം മൽസരിക്കും
