കോഴിക്കോട്: മഹാത്മാ ഗാന്ധി ഗ്രാമീണ തൊഴിലുറപ്പ് പദ്ധതിയിൽ തുടർച്ചയായ രണ്ടാംവർഷവും ഒരുകോടി തൊഴിൽദിനമെന്ന നേട്ടത്തിലേക്ക് അടുത്ത് കോഴിക്കോട് ജില്ല. സാമ്പത്തികവർഷം തീരാൻ 55 ദിവസങ്ങൾ ബാക്കി നിൽക്കെ ജില്ലയിലെ തൊഴിൽദിനങ്ങൾ 88.53 ലക്ഷം പിന്നിട്ടു. ഫെബ്രുവരിയിൽ ലക്ഷ്യമിട്ടത് 88.51 ലക്ഷം തൊഴിൽദിനമാണ്. ഈ ലക്ഷ്യം ഫെബ്രുവരി മൂന്നാം തീയതി തന്നെ മറികടക്കാനായി.
ഇതോടെ ഈ വർഷത്തെ ലേബർ ബജറ്റായ 94.16 ലക്ഷം തൊഴിൽദിനമെന്ന ലക്ഷ്യം ദിവസങ്ങൾക്കകം നിറവേറ്റും. ശേഷം ബജറ്റ് പുതുക്കുകകൂടി ചെയ്യുന്നതോടെ ഒരുകോടി തൊഴിൽദിനം സാധ്യമാകുമെന്നാണ് പ്രതീക്ഷ.
2020-21 വർഷത്തിലാണ് ആദ്യമായി ജില്ല ഒരുകോടി തൊഴിൽദിനമെന്ന ലക്ഷ്യം മറികടന്നത്. 1,02,40,605 തൊഴിൽദിനമാണ് ആ വർഷം സൃഷ്ടിച്ചത്. കോവിഡും ലോക്ക് ഡൗണും കടുത്ത പ്രതിസന്ധി തീർത്ത സമയത്ത് ഇതിനെയെല്ലാം മറികടന്നായിരുന്നു നേട്ടം. 2021-22 വർഷത്തിലും കോവിഡ് ഭീഷണി ഉയർത്തിയെങ്കിലും തൊഴിലുറപ്പ് പദ്ധതി വൈവിധ്യമായ പ്രവൃത്തികളിലൂടെ മുന്നേറി.
1,58,161 കുടുംബങ്ങൾക്കാണ് ജില്ലയിൽ ഈ വർഷം ഇതുവരെ തൊഴിൽ കിട്ടിയത്. ഇതിൽ 14,096 കുടുംബങ്ങൾ 100 തൊഴിൽദിനമെന്ന ലക്ഷ്യം സാക്ഷാൽകരിച്ചു.
Most Read: രാഷ്ട്രീയക്കാർക്ക് എതിരായ ക്രിമിനൽ കേസുകൾ കെട്ടിക്കിടക്കുന്നു; അമിക്കസ് ക്യൂറി കോടതിയിൽ
