ദോഹ: ഖത്തറിൽ ഈദുൽ ഫിത്വർ അവധി പ്രഖ്യാപിച്ചു. മാർച്ച് 30 മുതൽ ഏപ്രിൽ ഏഴുവരെ രാജ്യത്തെ മന്ത്രാലയങ്ങൾക്കും, സർക്കാർ സ്‌ഥാപനങ്ങൾക്കും, പൊതുമേഖലാ സ്‌ഥാപനങ്ങൾക്കും അവധിയായിരിക്കുമെന്ന് അമീരി ദിവാനി അറിയിച്ചു. അവധി കഴിഞ്ഞ് ഏപ്രിൽ എട്ടിന് പ്രവർത്തി ദിനമായിരിക്കും.
ഔദ്യോഗികമായി ഒമ്പത് ദിവസമാണ് അവധി പ്രഖ്യാപിച്ചതെങ്കിലും ഈ ആഴ്‌ചയിലെ വാരാന്ത്യ അവധി ഉൾപ്പടെ ജീവനക്കാർക്ക് 11 ദിവസത്തെ അവധി ലഭിക്കും. ഈ ആഴ്‌ചയിലെ അവസാന പ്രവർത്തി ദിനമായ വ്യാഴാഴ്‌ച കഴിഞ്ഞാൽ പിന്നെ ഏപ്രിൽ എട്ടിന് മാത്രമേ ജോലിയിൽ പ്രവേശിക്കേണ്ടതുള്ളൂ.
ഖത്തർ സെൻട്രൽ ബാങ്ക് ഉൾപ്പടെയുള്ള ധനകാര്യ സ്‌ഥാപനങ്ങൾ, ബാങ്കുകൾ, ഖത്തർ ഫിനാൻഷ്യൽ മാർക്കറ്റ്‌സ് അതോറിറ്റി നിയന്ത്രിക്കുന്ന സ്‌ഥാപനങ്ങൾ എന്നിവയുടെ അവധി സംബന്ധമായ തീരുമാനം ക്യൂബിസി ഗവർണർ കൈക്കൊള്ളണമെന്നും അമീരി ദിവാനി അറിയിച്ചു.
ഖത്തർ കലണ്ടർ ഹൗസിന്റെ പ്രഖ്യാപനം അനുസരിച്ച് ഞായറാഴ്‌ച ആയിരിക്കും ഖത്തറിൽ ഈദുൽ ഫിത്വർ എന്നാണ് കണക്കാക്കുന്നത്. അതേസമയം, രാജ്യത്തെ പൊതു അവധി ദിവസങ്ങളിലും അനിവാര്യമായി പ്രവർത്തിക്കേണ്ട മന്ത്രാലയങ്ങളും സർക്കാർ സ്‌ഥാപനങ്ങളും ചില ക്രമീകരണങ്ങളോടെ പ്രവർത്തിക്കും. ഇത് സംബന്ധമായ അറിയിപ്പ് അടുത്ത ദിവസങ്ങളിൽ മന്ത്രാലയങ്ങൾ നൽകുമെന്നാണ് പ്രതീക്ഷ.
Most Read| ഏറ്റവും കനംകുറഞ്ഞ നൂഡിൽസ്; ഇതാണ് ഗിന്നസ് റെക്കോർഡ് നേടിയ ആ മനുഷ്യൻ
