കൊച്ചി: അങ്കമാലിയിൽ വീടിന് തീപിടിച്ച് നാലുപേർ വെന്തു മരിച്ചു. അച്ഛനും അമ്മയും രണ്ടു കുട്ടികളുമാണ് മരിച്ചത്. അങ്കമാലി അങ്ങാടിക്കടവ് പറക്കുളം റോഡിലുള്ള ഇരുനില വീടിന്റെ മുകളിലത്തെ നിലയിൽ ഇന്ന് പുലർച്ചെയാണ് തീപിടിച്ചത്. വീടിന്റെ ഉടമസ്‌ഥനായ ബിനീഷ് കുര്യൻ (45), ഭാര്യ അനുമോൾ മാത്യു (40), മക്കളായ ജൊവാന (8), ജാസ്‌വിൻ (5) എന്നിവരാണ് മരിച്ചത്.
വീടിന്റെ താഴത്തെ നിലയിൽ കിടന്നുറങ്ങിയിരുന്ന ബിനീഷിന്റെ അമ്മ ചിന്നമ്മയാണ് തീയാളുന്നത് ആദ്യം കണ്ടത്. ഇവർ ബഹളം വെച്ചതോടെ അയൽവാസികൾ ഓടിയെത്തി തീയണക്കാൻ ശ്രമം തുടർന്നെങ്കിലും തീ ആളിപ്പടർന്നു. ബിനീഷും ഭാര്യം മക്കളും കിടന്നുറങ്ങിയിരുന്ന മുറിക്കാണ് തീപിടിച്ചത്. തീ അണച്ചപ്പോഴക്കും ഇവർ മരിച്ചിരുന്നു.
തീപിടിത്തത്തിന്റെ കാരണം വ്യക്‌തമല്ല. ഷോർട് സർക്യൂട്ട് സാധ്യത പോലീസ് പരിശോധിക്കുന്നുണ്ട്. ഫോറൻസിക് വിദഗ്‌ധർ സ്‌ഥലത്തെത്തി പരിശോധന ആരംഭിച്ചിട്ടുണ്ട്. മരിച്ച ബിനീഷ് അങ്കമാലിയിലെ വ്യാപാരിയാണ്. മൂത്തകുട്ടി ജൊവാന മൂന്നാം ക്ളാസിലും രണ്ടാമത്തെ കുട്ടി ജാസ്‌വിൻ ഒന്നാം ക്ളാസിലുമാണ് പഠിക്കുന്നത്.
Most Read| ബിജെപിക്കെതിരായ പരസ്യം; അപകീർത്തിക്കേസിൽ രാഹുൽ ഗാന്ധിക്ക് ജാമ്യം
