മലപ്പുറം: മുസ്ലിം ലീഗ് നേതാവും മുൻ മന്ത്രിയുമായ കെ കുട്ടി അഹമ്മദ് കുട്ടി (71) അന്തരിച്ചു. മലപ്പുറത്ത് താനൂരിലെ വീട്ടിലായിരുന്നു അന്ത്യം. 2004-2006 ഉമ്മൻ ചാണ്ടി മന്ത്രിസഭയിൽ തദ്ദേശസ്വയംഭരണ വകുപ്പ് മന്ത്രിയായിരുന്നു. മുസ്ലിം ലീഗ് സംസ്ഥാന എക്സിക്യൂട്ടീവ് അംഗമായ അദ്ദേഹം ലീഗിന്റെ മുൻ സംസ്ഥാന വൈസ് പ്രസിഡണ്ടായിരുന്നു.
താനൂർ മണ്ഡലത്തിൽ 1992ൽ നടന്ന ഉപതിരഞ്ഞെടുപ്പിലൂടെയാണ് കുട്ടി അഹമ്മദ് കുട്ടി നിയമസഭയിലേക്ക് എത്തുന്നത്. 1996ലും 2001ലും തിരൂരങ്ങാടിയിൽ നിന്ന് തിരഞ്ഞെടുക്കപ്പെട്ടു. 2001 മേയ് മുതൽ 2004 ഓഗസ്റ്റ് വരെ ഉണ്ടായിരുന്ന എകെ ആന്റണി മന്ത്രിസഭയിൽ കുട്ടി അഹമ്മദ് കുട്ടി ഉണ്ടായിരുന്നില്ല.
അതിനുശേഷം അധികാരത്തിലെത്തിയ ഉമ്മൻചാണ്ടി മന്ത്രിസഭയിൽ അംഗമായി. മുസ്ലിം ലീഗ് താനൂർ മണ്ഡലം പ്രസിഡണ്ട്, എസ്ടിയു മലപ്പുറം ജില്ലാ പ്രസിഡണ്ട് തുടങ്ങിയ ചുമതലകൾ വഹിച്ചു. ഭാര്യ: ജഹനാര. മക്കൾ: സുഹാന, സുഹാസ് അഹമ്മദ്, ഷഹബാസ് അഹമ്മദ്.
Most Read| തുംഗഭദ്ര അണക്കെട്ടിന്റെ ഗേറ്റ് തകർന്നു; 35,000 ക്യൂസെക്സ് വെള്ളം പുറത്തേക്ക് ഒഴുക്കിവിടുന്നു
