കരിപ്പൂർ: കോഴിക്കോട് വിമാനത്താവളത്തിൽ നിന്ന് അടുത്ത മാസം കൂടുതൽ വിമാന സർവീസുകളുമായി ഇൻഡിഗോ വിമാനക്കമ്പനി. മാർച്ച് ഒന്ന് മുതലാണ് സർവീസുകൾ കൂട്ടുന്നത്. നിലവിലുള്ള കോഴിക്കോട്- ജിദ്ദ സെക്‌ടറിലെ സർവീസുകളുടെ എണ്ണം കൂട്ടുന്നതിനൊപ്പം റാസൽഖൈമയിലേക്ക് പുതിയ സർവീസ് ആരംഭിക്കും.
കോഴിക്കോട്- ഫുജൈറ സെക്‌ടറിലും സർവീസ് പരിഗണനയിലുണ്ട്. നിലവിൽ കോഴിക്കോട്- ജിദ്ദ സെക്‌ടറിൽ ആഴ്‌ചയിൽ ഏഴ് സർവീസുകൾ ഉള്ളത് 11 ആകും. ജിദ്ദയിലേക്കുള്ള അധിക വിമാനം ഉച്ചയ്‌ക്ക് 1.50ന് കോഴിക്കോട്ട് നിന്ന് പുറപ്പെടും. സൗദി സമയം വൈകിട്ട് 6.30ന് ജിദ്ദയിൽ നിന്ന് കോഴിക്കോട്ടേക്ക് പുറപ്പെടും. റാസൽഖൈമ- കോഴിക്കോട് സെക്‌ടറിൽ ആഴ്‌ചയിൽ 5 സർവീസുകളാണ് ആരംഭിക്കുന്നത്.
കോഴിക്കോട് നിന്ന് പുലർച്ചെ 3.55ന് റാസൽഖൈമയിലേക്ക് പുറപ്പെടും. റാസൽഖൈമയിൽ നിന്ന് പ്രാദേശിക സമയം പകൽ 11.20ന് കോഴിക്കോട്ടേക്ക് പുറപ്പെടും. നിലവിൽ എയർ ഇന്ത്യ എക്‌സ്‌പ്രസും എയർ അറേബ്യയും കോഴിക്കോട്ട് നിന്ന് റാസൽഖൈമയിലേക്ക് സർവീസുകൾ ഉണ്ട്. ഇൻഡിഗോ കൂടി എത്തുന്നതോടെ യുഎഇ പ്രവാസികൾക്ക് യാത്രാ സൗകര്യം വർധിക്കും.
Most Read| രണ്ടാം ഭാര്യയുടെ പ്രേതത്തെ പേടി, 36 വർഷമായി സ്‌ത്രീ വേഷം കെട്ടി ജീവിക്കുന്ന പുരുഷൻ
