എംജിയിലെ പ്രതിഷേധ മാർച്ചിനിടെ അസഭ്യവർഷം; എസ്‌ഐക്കെതിരെ ഡിജിപിക്ക് പരാതി
ഗാന്ധിനഗർ എസ്‌ഐ സുധി കെ സത്യപാലനെതിരെയാണ് കെഎസ്‌യു മുൻ സംസ്‌ഥാന ജനറൽ സെക്രട്ടറി സുബിൻ മാത്യു ഡിജിപിക്ക് പരാതി നൽകിയത്.
ഇന്നലെ എംജി സർവകലാശാലയിൽ നടന്ന സമരത്തിനിടെയാണ് സുബിൻ മാത്യുവിനെ എസ്‌ഐ ആക്രോശിക്കുകയും അസഭ്യം പറയുകയും ചെയ്‌തത്‌.
കോട്ടയം: എംജി സർവകലാശാല പ്രതിഷേധ മാർച്ചിനിടെ പ്രവർത്തകർക്ക് നേരെ അസഭ്യവർഷം നടത്തിയ എസ്‌ഐക്കെതിരെ ഡിജിപിക്ക് പരാതി നൽകി കെഎസ്‌യു. ഗാന്ധിനഗർ എസ്‌ഐ സുധി കെ സത്യപാലനെതിരെയാണ് കെഎസ്‌യു മുൻ സംസ്‌ഥാന ജനറൽ സെക്രട്ടറി സുബിൻ മാത്യു ഡിജിപിക്ക് പരാതി നൽകിയത്.
പോലീസ് കംപ്ളെയിന്റ് അതോറിറ്റിക്കും പരാതി നൽകിയിട്ടുണ്ട്. ഇന്നലെ എംജി സർവകലാശാലയിൽ നടന്ന സമരത്തിനിടെയാണ് സുബിൻ മാത്യുവിനെ എസ്‌ഐ ആക്രോശിക്കുകയും അസഭ്യം പറയുകയും ചെയ്‌തത്‌. ജാഥയായെത്തിയ കെഎസ്‌യു പ്രവർത്തകർ മതിൽ ചാടിക്കടന്ന് അഡ്‌മിനിസ്‌ട്രേറ്റീവ് ഓഫീസ് ബ്ളോക്കിന് സമീപത്തെത്തി അടച്ചിട്ട ഗ്രില്ല് തുറക്കാൻ ശ്രമം നടത്തിയിരുന്നു.
പോലീസ് ഇവരെ അറസ്‌റ്റ് ചെയ്‌ത്‌ നീക്കുന്നതിനിടെ എസ്‌ഐ തെറി വിളിക്കുകയായിരുന്നു. ബലം പ്രയോഗിച്ചു സുബിൻ മാത്യുവിന്റെ ഷർട്ട് കീറുകയും, പോലീസ് ബസിൽ കയറ്റുകയും ചെയ്‌തു. എന്നാൽ, പിന്നാലെയെത്തി തെറിവിളി തുടർന്ന എസ്‌ഐയെ പിന്തിരിപ്പിക്കാൻ ശ്രമിച്ചെങ്കിലും ഫലമുണ്ടായില്ല. ഇതോടെ ഗാന്ധിനഗർ എസ്‌എച്ച്‌ഒ കെ ഷിജി ഇടപെട്ട് എസ്‌ഐയെ സമീപത്തെ സെക്യൂരിറ്റി റൂമിലേക്ക് മാറ്റി. ഇവിടെ നിന്നും എസ്‌ഐ രോഷാകുലനായി പ്രവർത്തകർക്ക് നേരെ അസഭ്യം പറഞ്ഞു.
പ്രതിഷേധത്തിൽ സുബിൻ ഉൾപ്പടെ പത്ത് പേരെ പോലീസ് അറസ്‌റ്റ് ചെയ്‌തിട്ടുണ്ട്‌. എസ്ഐയുടെ തെറിവിളി സാമൂഹിക മാദ്ധ്യമങ്ങളിലടക്കം വൈറലാവുകയും ഉദ്യോഗസ്‌ഥനെതിരെ വിമർശനം ഉയരുകയും ചെയ്‌തിരുന്നു. പിന്നാലെയാണ് സുബിൻ പരാതിയുമായി രംഗത്തെത്തിയത്. അതേസമയം, സർവീസിലുള്ള പരിചയക്കുറവാണ് ഇത്തരത്തിലുള്ള പെരുമാറ്റത്തിന് കാരണമെന്നാണ് മുതിർന്ന പോലീസ് ഉദ്യോഗസ്‌ഥർ പറയുന്നത്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
