കാസർഗോഡ്: തലപ്പാടിയിൽ കോവിഡ് പരിശോധനയ്ക്കായി വിപുലമായ സൗകര്യങ്ങൾ ഒരുക്കി ആരോഗ്യ വകുപ്പ്. ഇതിനായി തലപ്പാടിയിലെ വിശ്വാസ് ഓഡിറ്റോറിയത്തിൽ മൂന്ന് ബാച്ചുകളിലായി പരിശോധനാ സംഘത്തെ നിയോഗിച്ചു. ഒരു ദിവസം തന്നെ പരിശോധനാ ഫലം ആളുകൾക്ക് അവരുടെ മൊബൈൽ ഫോണിൽ ലഭ്യമാകുന്ന രീതിയിലാണ് സൗകര്യങ്ങൾ ഏർപ്പെടുത്തിയിരിക്കുന്നതെന്ന് അധികൃതർ അറിയിച്ചു.
കർണാടകയിലേക്ക് പ്രവേശിക്കുന്നവർക്ക് ആർടിപിസിആർ നെഗറ്റീവ് സർട്ടിഫിക്കറ്റ് നിർബന്ധമാക്കിയ സാഹചര്യത്തിലാണ് തലപ്പാടിയിൽ പരിശോധനാ സൗകര്യം ഒരുക്കാൻ അധികൃതർ തീരുമാനിച്ചത്. പരിശോധന നടത്തിയതിന്റെ തൊട്ടടുത്ത ദിവസം ഉച്ച മുതൽ labsys.health.kerala.gov.in എന്ന പോർട്ടലിൽ നിന്ന് പരിശോധനാഫലം ഡൗൺലോഡ് ചെയ്യാവുന്നതാണ്.
മംഗൽപാടി താലൂക്ക് ആശുപത്രിയാണ് പരിശോധനാ കേന്ദ്രത്തിന്റെ പ്രവർത്തനങ്ങൾക്ക് നേതൃത്വം നൽകുന്നത്. ആശുപത്രി സൂപ്രണ്ട്, ഡിഎംഒ, അഡ്മിനിസ്ട്രേറ്റീവ് മെഡിക്കൽ ഓഫിസർമാർ, കോവിഡ് നോഡൽ ഓഫിസർ, ജില്ലാ മാസ് മീഡിയ ഓഫിസർ എന്നിവർ കേന്ദ്രം സന്ദർശിച്ച് ആവശ്യമായ നിർദ്ദേശങ്ങൾ നൽകി.
Read Also: കോവിഡ് ഇളവുകളിലെ അശാസ്ത്രീയത; പ്രതിപക്ഷം ഇന്ന് സഭയിൽ ഉന്നയിക്കും
