തിരുവനന്തപുരം: ലോക ചാംപ്യൻമാരായ അർജന്റീന ഫുട്ബോൾ ടീമിന്റെ കേരള സന്ദർശനവുമായി ബന്ധപ്പെട്ട് ഉയർന്ന വിവാദങ്ങളിൽ പ്രതികരിച്ച് അർജന്റീന ഫുട്ബോൾ അസോസിയേഷൻ (എഎഫ്എ). ടീമിന്റെ കേരള സന്ദർശനവുമായി ബന്ധപ്പെട്ട കരാർ ലംഘിച്ചത് കേരള സർക്കാരാണെന്ന് അസോസിയേഷൻ മാർക്കറ്റിങ് വിഭാഗം മേധാവി ലിയാൻഡ്രോ പീറ്റേഴ്സൺ പറഞ്ഞു.
പണമടച്ചിട്ടും അർജന്റീന ടീം വരാൻ തയ്യാറായില്ലെന്ന ആരോപണങ്ങൾക്ക് മറുപടി നൽകുകയായിരുന്നു അദ്ദേഹം. ഒരു സ്പോർട്സ് ലേഖകൻ ലിയാൻഡ്രോ പീറ്റേഴ്സനുമായി നടത്തിയ ആശയവിനിമയത്തിന്റെ വിശദാംശങ്ങളാണ് പുറത്തുവന്നത്. 130 കോടിയോളം രൂപ അടച്ചിട്ടും കേരളത്തിൽ എത്താനാവില്ലെന്ന് അറിയിച്ചത് കരാർ ലംഘനമല്ലേ എന്ന് പീറ്റേഴ്സനോട് മാദ്ധ്യമപ്രവർത്തകൻ ചോദിച്ചു.
എന്നാൽ, അത് ശരിയല്ലെന്നാണ് അദ്ദേഹം മറുപടി നൽകിയത്. കരാർ ലംഘനം നടത്തിയത് കേരള സർക്കാർ ആണെന്നാണ് അദ്ദേഹത്തിന്റെ പ്രതികരണം. അതേസമയം, ഏത് തരത്തിലുള്ള കരാർ ലംഘനമാണ് കേരളം നടത്തിയെന്ന കാര്യം സന്ദേശത്തിൽ വ്യക്തമല്ല. മെസ്സിയെയും ടീമിനെയും കേരളത്തിലെത്തിക്കാൻ അർജന്റീന ഫുട്ബോൾ അസോസിയേഷന് 130 കോടി രൂപ നൽകിയിരുന്നുവെന്നാണ് സ്പോൺസർമാർ പറഞ്ഞത്.
ഈവർഷം ടീം കേരളത്തിൽ കളിക്കാമെന്ന കരാറിൽ അസോസിയേഷൻ ഒപ്പിട്ടിട്ടുണ്ട്. അടുത്തവർഷം സെപ്തംബറിൽ കളിക്കാനെത്തുമെന്നാണ് ഇപ്പോൾ അവരുടെ നിലപാട്. എന്നാൽ, ഈവർഷം എത്തുന്നുണ്ടെങ്കിലെ മൽസരം സംഘടിപ്പിക്കാൻ താൽപര്യമുള്ളൂവെന്നും കരാർ റദ്ദാക്കുന്നത് വലിയ സാമ്പത്തിക നഷ്ടത്തിന് കാരണമാകുമെന്നും കരാർ ലംഘിച്ചാൽ നിയമനടപടി സ്വീകരിക്കുമെന്നും സ്പോൺസർമാർ പറഞ്ഞിരുന്നു.
2025ൽ അർജന്റീന ടീമിനെ കേരളത്തിൽ എത്തിക്കുമെന്ന് കായികമന്ത്രി വി. അബ്ദുറഹ്മാൻ പ്രഖ്യാപിച്ചത് 2024ലാണ്. കേരളത്തിൽ ഫുട്ബോൾ അക്കാദമി ആരംഭിക്കുന്നതിനും സൗഹൃദ മൽസരത്തിനും അർജന്റീനൻ ഫുട്ബോൾ അക്കാദമി സന്നദ്ധത അറിയിച്ചിട്ടുണ്ടെന്നാണ് അന്ന് കായികമന്ത്രി പറഞ്ഞത്. എന്നാൽ, പിന്നീട് കാര്യങ്ങൾ മാറിമറയുകയായിരുന്നു.
Most Read| കടൽവെള്ളത്തിന് ഇളം ചുവപ്പ് നിറം! എന്തെന്ന് മനസിലാവാതെ എടക്കഴിയൂർ ഗ്രാമം
