തിരുവനന്തപുരം: കുട്ടികളുടെ സുരക്ഷ ഉറപ്പാക്കാൻ കർശന നടപടികൾക്കൊരുങ്ങി മോട്ടോർ വാഹനവകുപ്പ്. കാറുകളിലും ഇരുചക്ര വാഹനങ്ങളിലും യാത്ര ചെയ്യുന്ന കുട്ടികളുടെ സുരക്ഷയ്‌ക്കായാണ് മോട്ടോർ വാഹനവകുപ്പ് നിർദ്ദേശങ്ങൾ പുറപ്പെടുവിച്ചിരിക്കുന്നത്.
കാറിന്റെ പിൻസീറ്റിൽ കുട്ടികൾക്ക് ബെൽറ്റ് ഉൾപ്പടെയുള്ള പ്രത്യേക ഇരിപ്പിടവും നാല് വയസിനു മുകളിലുള്ള കുട്ടികൾക്ക് ഹെൽമറ്റും നിർബന്ധമാക്കും. ഘട്ടംഘട്ടമായി ഇത് നടപ്പാക്കുമെന്ന് ഗതാഗത കമ്മീഷണർ സിഎച്ച്‌ നാഗരാജു അറിയിച്ചു. ഒക്‌ടോബറിൽ സാമൂഹിക മാദ്ധ്യമങ്ങളിൽ ഉൾപ്പടെ ഇത് സംബന്ധിച്ച് ബോധവൽക്കരണം നടത്തും.
തുടർന്ന് നവംബറിൽ മുന്നറിയിപ്പ് നൽകിയശേഷം ഡിസംബർ മുതൽ പിഴയോടെ നിയമം നടപ്പാക്കാനാണ് വകുപ്പ് ഉദ്ദേശിക്കുന്നത്. നാല് വയസിൽ താഴെയുള്ള കുട്ടികൾക്ക് കാറുകളുടെ പിൻസീറ്റിൽ പ്രായത്തിന് അനുസരിച്ച്, ബെൽറ്റ് ഉൾപ്പടെയുള്ള പ്രത്യേക ഇരിപ്പിടം (ചൈൽഡ് റിസ്‌ട്രയിന്റ് സിസ്‌റ്റം) സജ്‌ജമാക്കണം.
നാല് മുതൽ 14 വയസുവരെയുള്ള, 135 സെ.മീ താഴെ ഉയരവുമുള്ള കുട്ടികൾ കാറിന്റെ പിൻസീറ്റിൽ ചൈൽഡ് ബൂസ്‌റ്റർ കുഷ്യനിൽ സുരക്ഷാ ബെൽറ്റ് ധരിച്ച് വേണം ഇരിക്കാൻ. സുരക്ഷാ സംവിധാനങ്ങൾ ഉപയോഗിക്കുന്നുണ്ടെന്ന് ഡ്രൈവർ ഉറപ്പാക്കണം. ഇരുചക്ര വാഹനങ്ങളിൽ നാല് വയസിന് മുകളിലുള്ള കുട്ടികൾക്ക് ഹെൽമറ്റ് നിർബന്ധമാണ്.
കുട്ടികളെ മാതാപിതാക്കളുമായി ചേർത്തുവെക്കുന്ന സുരക്ഷാ ബെൽറ്റ് ഉപയോഗിക്കുന്നതും നല്ലതാണ്. മാതാപിതാക്കൾക്കൊപ്പം യാത്ര ചെയ്യുമ്പോൾ കുട്ടികൾ ഉറങ്ങുന്ന സാഹചര്യം ഉള്ളതിനാലാണ് ഈ നിർദ്ദേശം. കുട്ടികൾക്ക് ഏതെങ്കിലും തരത്തിൽ അപകടമുണ്ടായാൽ ഡ്രൈവർക്കായിരിക്കും പൂർണ ഉത്തരവാദിത്തമെന്നും അധികൃതർ അറിയിച്ചു.
Most Read| എരുമേലിയിൽ കുറി തൊടുന്നതിന് പണപ്പിരിവ്; നടപടിയെടുക്കാൻ ഹൈക്കോടതി നിർദ്ദേശം
