ന്യൂഡെൽഹി: ഇംഗ്ളണ്ടിനെതിരായ മൂന്നാം ടെസ്റ്റിനൊരുക്കിയ പിച്ചിന് ഐസിസിയുടെ ശരാശരി റേറ്റിംഗ്. ശരാശരി റേറ്റിംഗ് കിട്ടിയതോടെ ടീം ഇന്ത്യക്ക് പിഴ ഒടുക്കുകയോ മറ്റ് ശിക്ഷകൾ നേരിടുകയോ ചെയ്യേണ്ടതില്ല. ഇതേ സ്റ്റേഡിയത്തിൽ നടന്ന നാലാം ടെസ്റ്റിനൊരുക്കിയ പിച്ചിന് ‘ഗുഡ്’ റേറ്റിംഗും ലഭിച്ചു. ടെസ്റ്റുകൾ അഹമ്മദാബാദിലെ നരേന്ദ്രമോദി സ്റ്റേഡിയത്തിലാണ് നടന്നത്.
മൂന്നാം ടെസ്റ്റ് മൽസരത്തിൽ 10 വിക്കറ്റിനാണ് ഇന്ത്യ ഇംഗ്ളണ്ടിനെ തകർത്തത്. 48 റൺസ് വിജയലക്ഷ്യവുമായി ഇറങ്ങിയ ഇന്ത്യ വിക്കറ്റ് നഷ്ടമില്ലാതെ വിജയിക്കുകയായിരുന്നു. രോഹിത് ശർമ്മ (25), ഗിൽ (15) എന്നിവർ പുറത്താവാതെ നിന്നു. 3 ദിവസം കൊണ്ട് അവസാനിച്ച ടെസ്റ്റിന് പിന്നാലെ പിച്ചിനെതിരെ വ്യാപക വിമർശനങ്ങൾ ഉയർന്നു. മുൻ താരങ്ങൾ അടക്കമുള്ളവർ പിച്ചിനെതിരെ ശബ്ദമുയർത്തിയിരുന്നു.
ഇതിന് പിന്നാലെ ഇന്ത്യൻ ക്യാപ്റ്റൻ വിരാട് കോഹ്ലി, ഓപ്പണർ രോഹിത് ശർമ്മ തുടങ്ങിയവർ പിച്ച് വിവാദത്തിൽ പ്രതികരിച്ചിരുന്നു. വിദേശ രാജ്യങ്ങളിൽ പേസ് ബൗളിംഗിനെ തുണക്കുന്ന പിച്ചുകൾ തയാറാക്കുമ്പോൾ ആരും അത് വിവാദമാക്കുന്നില്ലെന്നും പിന്നെ എന്താണ് ഇന്ത്യയിൽ സ്പിൻ പിച്ചുകൾ ഒരുക്കുന്നത് വിവാദമാക്കുന്നതെന്നും ഇവർ ചോദിച്ചു.
Read Also: വിഷുവിന് ഒടിടി റിലീസ്; ‘കൃഷ്ണന്കുട്ടി പണി തുടങ്ങി’
