വിഷ്ണു ഉണ്ണികൃഷ്ണനും സാനിയ ഇയ്യപ്പനും ഒന്നിക്കുന്ന ‘കൃഷ്ണൻകുട്ടി പണി തുടങ്ങി’ എന്ന ചിത്രം വിഷു ദിനത്തിൽ ഒടിടി പ്ളാറ്റ്ഫോമിലൂടെ പുറത്തിറങ്ങുന്നു. സീ ഫൈവ് പ്ളാറ്റ്ഫോമിലൂടെ ആണ് ചിത്രം റിലീസ് ചെയ്യുന്നത്.
ചിത്രത്തിന്റെ അണിയറ പ്രവത്തകരാണ് റിലീസ് വിശേഷം പങ്കുവെച്ചത്. വിഷ്ണുവും സാനിയയും ആദ്യമായി ഒന്നിക്കുന്ന ചിത്രം കൂടിയാണിത്. പെപ്പര് കോണ് സ്റ്റുഡിയോസിന്റെ ബാനറില് ഒരുങ്ങുന്ന ചിത്രം ഒരു കോമഡി ഹൊറര് ത്രില്ലറാണ്.
എന്റെ മെഴുതിരി അത്താഴങ്ങള് എന്ന ചിത്രത്തിന്റെ സംവിധായകന് സൂരജ് ടോമും, നിര്മ്മാതാവ് നോബിള് ജോസും വീണ്ടും ഒന്നിക്കുന്ന ചിത്രം കൂടിയാണിത്. ഹോം നഴ്സ് ആയ ഉണ്ണിക്കണ്ണന്റെ ജീവിതത്തില് അവിചാരിതമായി സംഭവിക്കുന്ന ചില കാര്യങ്ങളിലൂടെയാണ് ചിത്രത്തിന്റെ കഥ വികസിക്കുന്നത്.
ഉണ്ണിക്കണ്ണനായ് സ്ക്രീനിലെത്തുന്നത് വിഷ്ണു ഉണ്ണികൃഷ്ണനാണ്. സാനിയ ഇയ്യപ്പന് ചിത്രത്തിലെ മറ്റൊരു മുഖ്യ കഥാപാത്രത്തെ അവതരിപ്പിക്കുന്നു. ആനന്ദ് മധുസൂദനൻ ആണ് ചിത്രത്തിന് കഥയും, തിരക്കഥയും, സംഭാഷണവും ഒരുക്കുന്നു എന്ന പ്രത്യേകതയും ചിത്രത്തിനുണ്ട്.
ചിത്രത്തിന്റെ സംഗീതവും ആനന്ദിന്റെതാണ്. ഗാനരചന ഹരി നാരായണൻ. പ്രശസ്ത പ്രൊഡക്ഷൻ കൺട്രോളർ ബാദുഷയാണ് എക്സിക്യൂട്ടീവ് പ്രൊഡ്യൂസർ. ഇഫാർ മീഡിയയാണ് കൃഷ്ണൻകുട്ടി പണി തുടങ്ങി വിതരണം നിർവഹിക്കുന്നത്.