ഇടുക്കി: മുല്ലപ്പെരിയാര് ഡാമിലെ ജലനിരപ്പ് 9 മണിയോടെ 140 അടിയില് എത്തിയതായി തമിഴ്നാട് സര്ക്കാര് ഔദ്യോഗികമായി അറിയിച്ചു. വീണ്ടും ജലനിരപ്പ് ഉയര്ന്ന സാഹചര്യത്തില് 24 മണിക്കൂറിനുള്ളില് ഡാമിന്റെ ഷട്ടറുകള് തുറന്ന് അധിക ജലം പുറത്തേക്ക് ഒഴുക്കി വിടാന് സാധ്യത ഉണ്ട്.
ഷട്ടറുകള് തുറക്കുന്നതിനാല് പെരിയാര് നദിയുടെ ഇരുകരകളിലും താമസിക്കുന്നവര് അതീവ ജാഗ്രത പുലര്ത്തണമെന്ന് ഇടുക്കി ജില്ലാ കളക്ടർ അറിയിച്ചു. റൂള് കർവായ 141ല് എത്തിയാല് മുല്ലപ്പെരിയാര് വീണ്ടും തുറക്കുമെന്നും മുന്നറിയിപ്പുണ്ട്. ജലനിരപ്പ് ഉയര്ന്നതിനാല് തമിഴ്നാടിനോട് കൂടുതല് വെള്ളം കൊണ്ടു പോകണമെന്ന് കേരളം ആവശ്യപ്പെട്ടിട്ടുണ്ടെന്നാണ് റിപ്പോർട്.
ഡാമിന്റെ വൃഷ്ടി പ്രദേശങ്ങളിൽ ഇടവിട്ട് മഴ പെയ്യുന്നതിനാൽ നീരൊഴുക്ക് ശക്തമായി തുടരുകയാണ്. നാലായിരത്തോളം ഘനയടി വെള്ളമാണ് ഡാമിലേക്ക് ഒഴുകിയെത്തുന്നത്. തമിഴ്നാട് കൊണ്ടുപോകുന്ന വെള്ളത്തിന്റെ അളവും മാറ്റമില്ലാതെ തുടരുന്നു. 556 ഘനയടി വെള്ളം മാത്രമാണ് തമിഴ്നാട് ഇപ്പോൾ കൊണ്ടുപോകുന്നത്.
Most Read: ഇടുക്കി അണക്കെട്ട് തുറക്കല്; തീരുമാനം ഇന്ന്
