ഇത്തവണത്തെ സ്വാതന്ത്ര്യദിനാഘോഷം ഇന്ത്യൻ സൈനികർക്ക് സമർപ്പിച്ചിരിക്കുകയാണ് ട്വിറ്റർ. ഇതിനായി കഴിഞ്ഞ വർഷങ്ങളിലെന്നപോലെ ‘ഇമോജി’യുമായാണ് ട്വിറ്റർ എത്തിയിരിക്കുന്നത്. കേന്ദ്ര പ്രതിരോധ മന്ത്രാലയവുമായി ചേർന്നാണ് പ്രത്യേകം രൂപകൽപന ചെയ്ത ഇമോജി ട്വിറ്റർ അവതരിപ്പിക്കുന്നത്. ന്യൂഡൽഹിയിലെ ഇന്ത്യാ ഗേറ്റിന് സമീപത്തായി സ്ഥിതി ചെയ്യുന്ന ദേശീയ യുദ്ധ സ്മാരകത്തിന്റെ മാതൃകയിൽ ആണ് ഇത്തവണത്തെ ഇമോജി. ഓഗസ്റ്റ് 18 വരെയാണ് ഇമോജി ഉപയോക്താക്കൾക്ക് ലഭ്യമാവുക. സൈനികരുടെ ജീവന് ആദരമർപ്പിച്ചു കൊണ്ടുള്ള പ്രതിരോധ മന്ത്രാലയത്തിന്റെ #SaluteThe Soldier സംരംഭത്തിനും ട്വിറ്റർ പിന്തുണ നൽകുന്നുണ്ട്. അതേസമയം, നാഷണൽ വാർ മെമ്മോറിയൽ എന്ന പേരിൽ ഒരു പുതിയ ട്വിറ്റർ അക്കൗണ്ടും പ്രതിരോധ മന്ത്രാലയം ആരംഭിച്ചിട്ടുണ്ട്.
ഇംഗ്ലീഷ്, ഹിന്ദി,ഉറുദു, കന്നഡ, പഞ്ചാബി, മറാത്തി, മലയാളം, ബംഗാളി, തെലുങ്ക്, ഗുജറാത്തി, ഒറിയ എന്നീ ഭാഷകളിൽ സ്വാതന്ത്ര്യ ദിനം എന്ന് ഹാഷ്ടാഗ് ചെയ്യുമ്പോൾ ഇമോജി ലഭിക്കുമെന്ന് ട്വിറ്റർ അറിയിച്ചു. കൂടാതെ #SaluteThe Soldier, #IDAY2020, #NationalWarMemorial എന്നിവയ്ക്കൊപ്പവും ഇമോജികൾ ലഭ്യമാകും.
ഇത് ആറാം തവണയാണ് സ്വാതന്ത്ര്യദിനത്തോടനുബന്ധിച്ചു ട്വിറ്റർ ഇമോജി അവതരിപ്പിക്കുന്നത്. കഴിഞ്ഞ വർഷങ്ങളിൽ അശോക ചക്രം, ചെങ്കോട്ട, ഇന്ത്യൻ ദേശീയപതാക തുടങ്ങിയ ഇമോജികൾ ട്വിറ്റർ അവതരിപ്പിച്ചിരുന്നു.
