ധനുഷ്-കാർത്തിക് സുബ്ബരാജ് ചിത്രം ജഗമേ തന്തിരത്തിലെ വീഡിയോ ഗാനം പുറത്ത്. ധനുഷ് വരികളെഴുതി തയ്യാറാക്കിയ ഗാനം പാടിയിരിക്കുന്നതും അദ്ദേഹം തന്നെയാണ്. സന്തോഷ് നാരായണനാണ് ഗാനത്തിന് സംഗീതം നിർവഹിച്ചിരിക്കുന്നത്.
ആരാധകർ ഏറെ ആവേശത്തോടെ കാത്തിരിക്കുന്ന ഗ്യാങ്സ്റ്റർ ചിത്രമാണ് ജഗമേ തന്തിരം. ധനുഷിന്റെ 40ആം ചിത്രമെന്ന സവിശേഷതയും ജഗമേ തന്തിരത്തിനുണ്ട്. സുരുളി എന്ന കഥാപാത്രത്തെയാണ് ചിത്രത്തിൽ ധനുഷ് അവതരിപ്പിക്കുന്നത്. മധുരയില് നിന്നും ലണ്ടനില് എത്തിപ്പെടുന്ന കുപ്രസിദ്ധ ഗുണ്ടയായാണ് ധനുഷ് ചിത്രത്തില് പ്രത്യക്ഷപ്പെടുക. ഐശ്വര്യ ലക്ഷ്മിയാണ് ചിത്രത്തിൽ നായിക. ജോജു ജോർജും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്.
രജനീകാന്ത് നായകനായി എത്തിയ പേട്ടക്ക് ശേഷം കാർത്തിക് സുബ്ബരാജ് സംവിധാനം ചെയ്യുന്ന ചിത്രമാണ് ജഗമേ തന്തിരം. എസ് ശശികാന്താണ് ചിത്രം നിർമിക്കുന്നത്.
വൈനോട്ട് സ്റ്റുഡിയോസും റിലയൻസ് എന്റർടെയിൻമെന്റും ചേർന്നാണ് ചിത്രം റിലീസ് ചെയ്യുന്നത്. ജൂൺ 18ന് നെറ്റ്ഫ്ളിക്സിലൂടെ ചിത്രം പ്രേക്ഷകരിലേക്ക് എത്തും. കഴിഞ്ഞ വർഷം മെയ് മാസത്തിൽ പ്രദർശനത്തിന് എത്തേണ്ടിയിരുന്ന ചിത്രത്തിന്റെ റിലീസ് കോവിഡ് പ്രതിസന്ധിയെ തുടർന്ന് നീണ്ടു പോകുകയായിരുന്നു.
Read also: ശരീരത്തിൽ നിറയെ തേനീച്ചകളുമായി ആഞ്ജലീന; അമ്പരപ്പിച്ച് ഫോട്ടോഷൂട്ട്
