ന്യൂഡെൽഹി: ‘വികസിത് ഭാരത് 2047′ ലക്ഷ്യമിട്ട് മാർഗരേഖ സമർപ്പിക്കാൻ രണ്ട് അനൗദ്യോഗിക മന്ത്രിതല സമിതികൾ രൂപീകരിച്ച് കേന്ദ്ര സർക്കാർ. സാമ്പത്തിക-സാമൂഹിക മേഖലകളിൽ പരിഷ്‌കാരങ്ങൾ നിർദ്ദേശിക്കുന്നതിനാണ് സമിതികൾ. ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്‌നാഥ്‌ സിങ് എന്നിവർ സമിതികളെ നയിക്കും.
ധനമന്ത്രി നിർമല സീതാരാമൻ, വാണിജ്യ- വ്യവസായ മന്ത്രി പിയൂഷ് ഗോയൽ എന്നിവരുൾപ്പടെ 13 അംഗങ്ങളാണ് അമിത് ഷായുടെ സമിതിയിൽ ഉള്ളത്. റെയിൽവേ, ഐടി മന്ത്രി അശ്വിനി വൈഷ്‌ണവ് ഇതിന്റെ കൺവീനർ.
ധനകാര്യം, വ്യവസായം, വാണിജ്യം, അടിസ്‌ഥാന സൗകര്യങ്ങൾ, ലോജിസ്‌റ്റിക്‌സ്, വിഭവങ്ങൾ, ശാസ്‌ത്ര സാങ്കേതികം, ഭരണം എന്നിവയുൾപ്പടെയുള്ള സാങ്കേതിക, സാമ്പത്തിക മേഖലകളിൽ നിയമനിർമാണപരവും നയപരവുമായ പരിഷ്‌കരണ അജണ്ട തയ്യാറാക്കുന്നതിലാണ് ഈ സമിതി ശ്രദ്ധ കേന്ദ്രീകരിക്കുന്നത്.
സാമൂഹിക-ക്ഷേമ-സുരക്ഷാ മേഖലകളിലെ പരിഷ്‌കരണത്തിന് രാജ്‌നാഥ്‌ സിങ് നേതൃത്വം നൽകുന്ന സമിതിയിൽ 18 അംഗങ്ങളാണ് ഉള്ളത്. വിദ്യാഭ്യാസം, ആരോഗ്യം, പ്രതിരോധം, നൈപുണ്യ വികസനം, സാമൂഹ്യക്ഷേമം, ഭവനം, തൊഴിൽ, പൊതുജനാരോഗ്യം തുടങ്ങിയ മേഖലകളിലെ പരിഷ്‌കാരങ്ങൾക്കുള്ള സാധ്യതകൾ ഈ സംഘം പരിശോധിക്കും.
റോഡ് ഗതാഗത, ഹൈവേ മന്ത്രി നിതിൻ ഗഡ്‌കരി, കൃഷി മന്ത്രി ശിവരാജ് സിങ് ചൗഹാൻ എന്നിവർ ഈ പാനലിലെ അംഗങ്ങളാണ്. തൊഴിൽ, കായിക മന്ത്രി മൻസുഖ് മാണ്ഡവ്യയാണ് കൺവീനർ. അടുത്ത തലമുറയിലെ പരിഷ്‌കാരങ്ങളുടെ ആവശ്യകതയ്‌ക്കായി കർമസേന രൂപീകരിക്കുമെന്ന് പ്രധാനമന്ത്രി നരേന്ദ്രമോദി സ്വാതന്ത്ര്യദിന പ്രസംഗത്തിൽ പ്രഖ്യാപിച്ചിരുന്നു. ഇതിന്റെ ഭാഗമായിട്ടാണ് പുതിയ മന്ത്രിതല സമിതികൾ രൂപീകരിച്ചിട്ടുള്ളത്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
