മാനന്തവാടി: തലപ്പുഴ എൻജിനിയറിങ് കോളേജിൽ എസ്എഫ്ഐ-യുഡിഎസ്എഫ് സംഘർഷത്തിൽ 5 വിദ്യാർഥികൾക്ക് പരിക്ക്. യുഡിഎഫ് പ്രവർത്തകനായ രണ്ടാംവർഷ ഇലക്‌ട്രേണിക്‌സ് വിദ്യാർഥിയും തലശ്ശേരി പാലോട് സ്വദേശിയുമായ ആദിൻ അബ്‌ദുല്ലയുടെ (20) മൂക്കിന് സാരമായി പരിക്കേറ്റു. പോലീസ് എത്തിയാണ് സ്‌ഥിതി നിയന്ത്രണ വിധേയമാക്കിയത്.
പരിക്കേറ്റവരെ ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം എസ്എഫ്ഐ കോളേജിൽ നടത്തിയ പരിപാടിയിൽ പുറമെ നിന്നുള്ള ഡിവൈഎഫ്ഐ പ്രവർത്തകർ എത്തുകയും ഹോസ്‌റ്റലിൽ താമസിക്കുന്ന യുഡിഎഫ് പ്രവർത്തകരെ ഭീഷണിപ്പെടുത്തിയെന്നും ആരോപണം ഉയർന്നിരുന്നു. ഇത് ചോദ്യം ചെയ്യുന്നതിനിടെ യാതൊരുവിധ പ്രകോപനവും ഇല്ലാതെ എസ്എഫ്ഐ പ്രവർത്തകർ അക്രമിക്കുകയായിരുന്നെന്ന് യുഡിഎഫ് ആരോപിക്കുന്നു.
രണ്ടു ദിവസം മുൻപ് മാനന്തവാടി ജോസ് തിയേറ്ററിന് മുന്നിൽ വെച്ച് സംഘർഷമുണ്ടായിരുന്നു. കോളേജ് വിദ്യാർഥികളും ഒരു സംഘം ആളുകളുമാണ് ഏറ്റുമുട്ടിയത്. അന്നും പോലീസെത്തിയാണ് സ്‌ഥിതി നിയന്ത്രണ വിധേയമാക്കിയത്.
Most Read| ഒറ്റ ദിവസം ആറ് ഗണിത റെക്കോർഡുകൾ; കണക്കിൽ അമ്മാനമാടുന്ന 14 വയസുകാരൻ
