മലപ്പുറം: മങ്കടയിൽ 12-കാരിയെ പീഡിപ്പിച്ച കേസിൽ പെൺകുട്ടിയുടെ അമ്മയുടെ കാമുകൻ അറസ്റ്റിൽ. ഒളിവിലായിരുന്ന പ്രതി മഞ്ചേരി പോക്സോ സ്പെഷ്യൽ കോടതിയിൽ കീഴടങ്ങുകയായിരുന്നു. പാലക്കാട് ചെർപ്പുളശ്ശേരി ചളവറ സ്വദേശി വിനീഷ് ആണ് കോടതിയിൽ ഹാജരായത്. അതേസമയം, പീഡനത്തിന് ഇരയായ പെൺകുട്ടിയുടെ അമ്മയെ കഴിഞ്ഞ മാസം പോലീസ് അറസ്റ്റ് ചെയ്തിരുന്നു.
2019 ജനുവരി ഒന്ന് മുതൽ 2021 ജൂൺ 30 വരെയുള്ള കാലയളവിൽ പ്രായപൂർത്തിയാകാത്ത പെൺകുട്ടിയെ വാടക വീടുകളിൽവെച്ചു പലതവണ പീഡിപ്പിച്ചുവെന്നാണ് കേസ്. ആനമങ്ങാടും വള്ളിക്കാപ്പറ്റയിലുമുള്ള വാടക വീടുകളിൽ എത്തിച്ച് നിരവധി തവണ പെൺകുട്ടിയെ പീഡനത്തിന് ഇരയാക്കിയിട്ടുണ്ട്. പെൺകുട്ടി ഈ കാര്യം പോലീസിൽ മൊഴി നൽകിയിട്ടുണ്ട്.
ഒക്ടോബർ 19ന് മലപ്പുറം വനിതാ പോലീസിൽ പരാതി നൽകുകയായിരുന്നു. പ്രതിക്ക് എല്ലാവിധ ഒത്താശയും ചെയ്ത് കൊടുത്ത കുട്ടിയുടെ അമ്മയായ 30 കാരിയെ കഴിഞ്ഞ മാസം 20ന് പോലീസ് അറസ്റ്റ് ചെയ്തിരുന്നു. ഇവർ ഇപ്പോൾ റിമാൻഡിലാണ്. അതേസമയം, പെൺകുട്ടിയുടെ സംരക്ഷണം മുത്തശ്ശനും മുത്തശ്ശിയും ഏറ്റെടുത്തു.
Most Read: ചെങ്കോട്ടയിലെ സംഘർഷം; അറസ്റ്റിലായ കർഷകർക്ക് 2 ലക്ഷം വീതം പ്രഖ്യാപിച്ച് പഞ്ചാബ്
