സ്‌ത്രീധന വിരുദ്ധ കാംപയിൻ; സമാപന സമ്മേളനം മധുപാൽ ഉൽഘാടനം നിർവഹിക്കും
പൊന്നാനിയുടെ ആഗോള കൂട്ടായ്‌മയായ പൊന്നാനി കൾച്ചറൽ വേൾഡ് ഫൗണ്ടേഷൻ (PCWF) കാമ്പസ് തലത്തിൽ നവംബർ 26 മുതൽ നടത്തിവരുന്ന സ്‌ത്രീധന വിരുദ്ധ കാംപയിനിൽ ഇതുവരെ പതിനായിരത്തോളം വിദ്യാർഥികൾ പെങ്കെടുത്തു. നാളെ നടക്കുന്ന സമാപന സമ്മേളനത്തിലും 500ഓളം യുവതിയുവാക്കൾ സ്‌ത്രീധന വിരുദ്ധ പ്രതിജ്‌ഞ ചൊല്ലും.
മലപ്പുറം: ജില്ലയിലെ പൊന്നാനിയിൽ നാളെ നടക്കുന്ന സ്‌ത്രീധന വിരുദ്ധ കാംപയിൻ സമാപന സമ്മേളനത്തിൽ സംവിധായകനും നടനും എഴുത്തുകാരനും സംസ്‌ഥാന സാംസ്‌കാരിക പ്രവർത്തക ക്ഷേമനിധി ബോർഡ് ചെയർമാനുമായ മധുപാൽ പങ്കെടുക്കും.
താലൂക്കിലെ തദ്ദേശിയരുടെയും വിവിധ വിദേശരാജ്യങ്ങളിൽ ജോലിചെയ്യുന്ന പ്രവാസികളുടെയും ആഗോള കൂട്ടായ്‌മയായ പൊന്നാനി കൾച്ചറൽ വേൾഡ് ഫൗണ്ടേഷന്റെ (PCWF) ആഭിമുഖ്യത്തിലാണ് കാംപയിൻ നടന്നുവരുന്നത്. എൻഎസ്‌എസ്‌ യൂണിറ്റുകളുടെയും വിവിധ വനിതാ സമിതികളുടെയും സഹകരണത്തോടെ, കഴിഞ്ഞ 25 ദിവസമായി നടക്കുന്ന സ്‌ത്രീധന വിരുദ്ധ കാമ്പസ് തല കാംപയിൻ നാളെ (വ്യാഴം) കടകശ്ശേരി ഐഡിയൽ കോളേജിലാണ് സമാപിക്കുന്നത്.
‘സ്‌ത്രീധനം വെടിഞ്ഞ് സ്‌ത്രീ വിജയം നേടുക‘ എന്ന സന്ദേശം പ്രമേയമാക്കിയ കാംപയിൻ സ്‌ത്രീധന വിരുദ്ധ ദിനമായ നവംബർ 26നാണ് ആരംഭിച്ചത്. താലൂക്കിലെ മുഴുവൻ കോളേജ് കാമ്പസുകളിലും സംഘടിപ്പിച്ച കാംപയിനിൽ ബോധവൽക്കരണ ക്ളാസുകൾ, ലഘുലേഖ വിതരണം, സ്‌ത്രീധന വിരുദ്ധ പ്രതിജ്‌ഞ, പ്രസംഗ-പ്രബന്ധ മൽസരം, കലാപരിപാടികൾ എന്നിവ നടന്നു.
സ്‌ത്രീധന വിരുദ്ധ സന്ദേശം ഉയർത്തി നടത്തിയ വിവിധ മൽസരങ്ങളിലെ കോളേജ് തല വിജയികളായ വിദ്യാർഥികൾ, നാളെ സമാപന സമ്മേളനം നടക്കുന്ന കടകശ്ശേരി ഐഡിയൽ കോളേജിൽ 22ന് കാലത്ത് 10 മണി മുതൽ താലൂക്ക് തല മൽസരങ്ങളിൽ പങ്കെടുക്കും.
ഉച്ചക്ക് 1 മണിക്ക് ശേഷം നടക്കുന്ന സമാപന സമ്മേളനം മധുപാൽ ഉൽഘാടനം ചെയ്യും. തവനൂർ ഗ്രാമ പഞ്ചായത്ത് പ്രസിഡണ്ട് സിപി നസീറ മുഖ്യാതിഥി ആയിരിക്കും. വിവിധ മേഖലയിൽ നിന്നുള്ള ജനപ്രതിനിധികളും സാമൂഹ്യ സാംസ്‌കാരിക നേതാക്കളും പങ്കെടുക്കും.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
