ജാര്‍ഖണ്ഡ്: ജാര്‍ഖണ്ഡ് സര്‍ക്കാരിനെ അട്ടിമറിക്കുമെന്ന് വെല്ലുവിളിച്ച ബിജെപി നേതാവിനെതിരെ പൊലീസ് കേസെടുത്തു. രണ്ട് മാസത്തിനുള്ളില്‍ ഹേമന്ദ് സോറന്റെ നേതൃത്വത്തിലുള്ള മന്ത്രിസഭ അട്ടിമറിക്കുമെന്നാണ് ഇയാള്‍ വെല്ലുവിളിച്ചത്. ബിജെപി സംസ്‌ഥാന അധ്യക്ഷന്‍ ദീപക് പ്രകാശിനെതിരെയാണ് രാജ്യദ്രോഹക്കുറ്റം ഉള്‍പ്പെടെ ചുമത്തി കേസെടുത്തത്.
പ്രകാശിന്റെ പരാമര്‍ശത്തിന് പിന്നാലെ തെരഞ്ഞെടുക്കപ്പെട്ട സര്‍ക്കാരിനെ അസ്‌ഥിരപ്പെടുത്താന്‍ ശ്രമിക്കുകയാണെന്നും സര്‍ക്കാര്‍ ഉദ്യോഗസ്‌ഥരെ ഭീഷണിപ്പെടുത്തിയെന്നും ആരോപിച്ച് ദുംക ജില്ലയിലെ കോണ്‍ഗ്രസ് ജില്ലാ പ്രസിഡണ്ട് ശ്യാമല്‍ കുമാര്‍ സിംഗ് പൊലീസിന് പരാതി നല്‍കിയിരുന്നു.
124 എ, 504, 506, 120 (ബി) എന്നീ വകുപ്പുകള്‍ ചുമത്തിയാണ് ദുംക പൊലീസ് എഫ്‌ഐആര്‍ രജിസ്‌റ്റര്‍ ചെയ്‌തിട്ടുള്ളത്. എന്നാല്‍, താന്‍ പറഞ്ഞതില്‍ ഇപ്പോഴും ഉറച്ച് നില്‍ക്കുന്നുവെന്നും പറ്റുമെങ്കില്‍ തന്നെ അറസ്‌റ്റ് ചെയ്‌ത്‌ നോക്കൂവെന്നും പ്രകാശ് വെല്ലുവിളിച്ചു.
Read also: മയക്കുമരുന്ന് കേസ്: മുന്‍കൂര്‍ ജാമ്യാപേക്ഷയുമായി ദീപികയുടെ മാനേജര്‍ കോടതിയില്‍
