തിരുവനന്തപുരം: സംസ്ഥാനത്ത് ഭക്ഷ്യസുരക്ഷാ വകുപ്പ് നടത്തുന്ന പരിശോധനകളില് പിഴവ് കണ്ടെത്തിയാല് വിട്ടുവീഴ്ചയില്ലെന്നും കര്ശന നടപടി സ്വീകരിക്കുമെന്നും ആരോഗ്യ വകുപ്പ് മന്ത്രി വീണാ ജോര്ജ്. ഭക്ഷണത്തില് മായം ചേര്ക്കുന്നത് ഗുരുതരമായ കുറ്റമാണെന്നും അത്തരക്കാര്ക്കെതിരെ കടുത്ത നടപടി സ്വീകരിക്കുമെന്നും മന്ത്രി പറഞ്ഞു.
‘നല്ല ഭക്ഷണം നാടിന്റെ അവകാശം’ എന്ന പേരില് ഭക്ഷ്യ വസ്തുക്കളിലെ മായം കണ്ടെത്താന് ഭക്ഷ്യ സുരക്ഷാ വകുപ്പ് പുതിയൊരു ക്യാമ്പയിന് ആരംഭിച്ചിരുന്നു. ഈ ക്യാമ്പയിന്റെ ഭാഗമായി പരിശോധനകള് ശക്തമാക്കിയിരുന്നു. ഈ മാസം 2 മുതല് ഇന്നുവരെ കഴിഞ്ഞ 5 ദിവസങ്ങളിലായി സംസ്ഥാന വ്യാപകമായി 1132 പരിശോധനകളാണ് നടത്തിയത്.
ലൈസന്സോ രജിസ്ട്രേഷനോ ഇല്ലാത്ത 61 കടകളും വൃത്തിഹീനമായ 49 കടകളും ഉള്പ്പടെ ആകെ 110 കടകള് പൂട്ടിച്ചു. 347 സ്ഥാപനങ്ങള്ക്ക് നോട്ടീസ് നല്കി. 140 കിലോഗ്രാം വൃത്തിഹീനമായ മാംസം പിടിച്ചെടുത്ത് നശിപ്പിച്ചു. 93 സാമ്പിളുകള് പരിശോധനയ്ക്ക് അയച്ചതായും മന്ത്രി വ്യക്തമാക്കി.
‘നല്ല ഭക്ഷണം നാടിന്റെ അവകാശം’ എന്ന ക്യാമ്പയിന്റെ ഭാഗമായി മീനിലെ മായം കണ്ടെത്താന് ‘ഓപ്പറേഷന് മൽസ്യ’, ശര്ക്കരയിലെ മായം കണ്ടെത്താന് ‘ഓപ്പറേഷന് ജാഗറി’ എന്നിവ ആവിഷ്ക്കരിച്ച് പരിശോധനകള് ശക്തമാക്കിയിട്ടുണ്ട്. ഇതുകൂടാതെ വെളിച്ചെണ്ണ, കറി പൗഡറുകള്, പാല് തുടങ്ങിയ ഭക്ഷ്യ വസ്തുക്കളും പ്രത്യേകമായി പരിശോധിക്കുന്നതാണ്. സംസ്ഥാനത്ത് ചെക്പോസ്റ്റുകള്, കടകള്, മാര്ക്കറ്റുകള്, ഭക്ഷ്യ നിര്മാണ കേന്ദ്രങ്ങള് എന്നിവ കേന്ദ്രീകരിച്ച് റെയ്ഡുകള് കൂടുതൽ ശക്തമാക്കും; മന്ത്രി അറിയിച്ചു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
