നെയ്റോബി: ലോക ജൂനിയർ അത്ലറ്റിക് ചാമ്പ്യൻഷിപ്പിൽ വെള്ളി മെഡൽ സ്വന്തമാക്കി ഇന്ത്യ. അണ്ടർ 20 അത്ലറ്റിക് ചാമ്പ്യൻഷിപ്പിൽ 10 കിലോ മീറ്റർ നടത്ത മൽസരത്തിലാണ് ഇന്ത്യയുടെ അമിത് ഖാത്രി വെള്ളി നേടിയിരിക്കുന്നത്.
നെയ്റോബിയിൽ പുരോഗമിക്കുന്ന ലോക അണ്ടർ 20 അത്ലറ്റിക്സ് ചാമ്പ്യൻഷിപ്പിലെ ഇന്ത്യയുടെ രണ്ടാമത്തെ മെഡലാണിത്. ലോക അണ്ടർ 20 അത്ലറ്റിക്സിന്റെ ചരിത്രത്തിലെ ഇന്ത്യയുടെ ആറാമത്തെ മെഡലും കൂടിയാണ് അമിത് ഖാത്രി നേടിയിരിക്കുന്നത്.
42 മിനിറ്റ് 17.94 സമയം കൊണ്ട് ഫിനിഷ് ചെയ്താണ് അമിത് ഖാത്രിയുടെ വെള്ളി മെഡൽ നേട്ടം. ഇതോടെ പുതിയ ദേശിയ അണ്ടർ 20 റെക്കോർഡും അമിത് ഖാത്രി തന്റെ പേരിൽ ചേർത്തിരിക്കുകയാണ്.
നേരത്തെ മിക്സഡ് റിലേയില് ഇന്ത്യന് ടീം വെങ്കലം സ്വന്തമാക്കിയിരുന്നു. ഇന്ത്യന് സംഘം 3:20.60 സമയത്തില് ഫിനിഷ് ചെയ്തു. ഭരത് എസ്, സുമി, പ്രിയ മോഹന്, കപില് എന്നിവര് അടങ്ങിയ ടീമാണ് ഇന്ത്യക്കായി മൽസരിച്ചത്. ഹീറ്റ്സില് മൽസരിച്ച ടീമില് മലയാളി താരം അബ്ദുൾ റസാഖും ഉണ്ടായിരുന്നു. നൈജീരിയ സ്വര്ണവും പോളണ്ട് വെള്ളിയും നേടി.
അതേസമയം, വനിതകളുടെ 400 മീറ്റർ ഫൈനലിൽ പ്രിയാ മോഹൻ ഇന്നിറങ്ങും. ആൺകുട്ടികളുടെ 4×400 മീറ്റർ റിലേയിൽ രണ്ടാം ഹീറ്റ്സിലും ഇന്ത്യ മൽസരിക്കും.
Also Read: സുപ്രീം കോടതിക്ക് മുന്നിൽ ഭാര്യയ്ക്കൊപ്പം തീകൊളുത്തി; യുവാവ് മരിച്ചു
