തിരുവനന്തപുരം: സംസ്ഥാനത്ത് ഇന്നും മഴ കനക്കും. തിരുവനന്തപുരം. കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിൽ അടുത്ത മണിക്കൂറുകളിൽ ഒറ്റപ്പെട്ടയിടങ്ങളിൽ ശക്തമായ മഴക്ക് സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.
മഴ തുടരുന്ന സാഹചര്യത്തിൽ തിരുവനന്തപുരം, കൊല്ലം, ആലപ്പുഴ, എറണാകുളം, കോഴിക്കോട്, കണ്ണൂർ, കാസർഗോഡ് ജില്ലകളിൽ ഇന്ന് യെല്ലോ അലർട് പുറപ്പെടുവിച്ചു. ഇന്ന് എവിടെയും റെഡ്, ഓറഞ്ച് അലർട്ടുകൾ ഇല്ല. ഇന്ന് രാത്രിവരെ കേരളാ തീരത്ത് കടലേറ്റത്തിനും ഉയർന്ന തിരമാലകൾക്കും സാധ്യതയുണ്ടെന്ന് ദേശീയ സമുദ്ര ഗവേഷണ കേന്ദ്രം മുന്നറിയിപ്പ് നൽകി. മൽസ്യബന്ധനത്തിനും വിലക്ക് തുടരുകയാണ്.
അതേസമയം, വൃഷ്ടി പ്രദേശങ്ങളിൽ മഴ ശക്തമായതിനാൽ കല്ലാർകുട്ടി, പാംബ്ള ഡാമുകൾ തുറന്നു. രാവിലെ ആറുമണിക്ക് ശേഷമാണ് തുറന്നത്. കല്ലാർകുട്ടി ഡാമിൽ നിന്ന് സെക്കൻഡിൽ 300 ഘനയടി വെള്ളവും പാംബ്ള ഡാമിൽ നിന്ന് 600 ഘനയടി വെള്ളവും പുറത്തേക്ക് ഒഴുക്കിവിടും. മുതിരപ്പുഴയാർ, പെരിയാർ എന്നിവയുടെ ഇരുകരകളിലുള്ളവർ ജാഗ്രത പാലിക്കണമെന്ന് അധികൃതർ നിർദ്ദേശം നൽകി.
Most Read| ലോക്സഭാ തിരഞ്ഞെടുപ്പ്; ആറാംഘട്ട വോട്ടെടുപ്പ് ആരംഭിച്ചു
