അബുദാബി: യുഎഇയിൽ ഒരാളിൽ നിന്ന് കോവിഡ് 19 പടർന്നത് 45 പേരിലേക്ക്. ഒരാൾ മരിക്കുകയും ചെയ്തു. കോവിഡ് രോഗം ബാധിച്ച വ്യക്തി ആരോഗ്യ വകുപ്പിന്റെ നിർദ്ദേശങ്ങൾ പാലിക്കാതെ മറ്റുള്ളവരുമായി സമ്പർക്കം പുലർത്തിയതാണ് ഇത്രയധികം പേർക്ക് രോഗം ബാധിക്കാൻ ഇടയാക്കിയതെന്ന് യുഎഇ അധികൃതർ പറഞ്ഞു. മൂന്നു കുടുംബത്തിലെ 45 പേർക്കാണ് ഒരു വ്യക്തിയിലൂടെ രോഗം പടർന്നത്.
കോവിഡ് ലക്ഷണങ്ങൾ കണ്ടതിനെ തുടർന്ന് ഈ വ്യക്തിയോട് ക്വാറന്റൈനിൽ പോകാൻ ആരോഗ്യ വിഭാഗം നിർദ്ദേശിച്ചിരുന്നു. എന്നാൽ, ഇത് അനുസരിക്കാതെ മറ്റുള്ളവരുമായി അടുത്ത് ഇടപഴകുകയും പുറത്തിറങ്ങി നടക്കുകയും ചെയ്തു. ഇതിനെത്തുടർന്ന് ഇയാളുടെ ഭാര്യ അടക്കമുള്ളവർക്ക് രോഗം ബാധിച്ചു. ഇവരുടെ കുടുംബത്തിലെ പ്രായംകൂടിയ ഒരാൾ രോഗം ബാധിച്ച് മരിക്കുകയും ചെയ്തു.
Lack of practicing precautionary and safety protocols by an individual have led to the infection of his wife, widening the spread to 3 families, resulting in 45 positive cases and an unfortunate death.#CommitToWin
— NCEMA UAE (@NCEMAUAE) September 8, 2020
ബന്ധുക്കളുമായി കൂടിച്ചേരലുകൾ നടത്തിയതാണ് ഇത്രയും പേർക്ക് രോഗം ബാധിക്കാൻ കാരണമെന്ന് യുഎഇ സർക്കാർ വക്താവ് ഡോ. ഒമർ അൽ ഹമീദി പറഞ്ഞു. പ്രിയപ്പെട്ടവരുടെ സുരക്ഷ ഉറപ്പാക്കുകയെന്നത് ഓരോ വ്യക്തികളുടെയും ഉത്തരവാദിത്തമാണ്. എല്ലാവരും അവരവരുടെയും കുടുംബത്തിന്റെയും സുരക്ഷ ഉറപ്പാക്കേണ്ടതുണ്ട്. ബന്ധുക്കളും സുഹൃത്തുക്കളുമായുള്ള കൂടിച്ചേരലുകൾ നിർബന്ധമായും ഒഴിവാക്കണമെന്നും അദ്ദേഹം ആവശ്യപ്പെട്ടു.
Related News: പാര്‍ശ്വഫലമെന്ന് സംശയം; ഓക്സ്ഫോര്‍ഡ് വാക്‌സിന്‍ പരീക്ഷണം നിര്‍ത്തിവെച്ചു
