മലപ്പുറം: സന്തോഷ് ട്രോഫി ചാമ്പ്യൻഷിപ്പിൽ സെമി ലൈനപ്പായി. ആദ്യ സെമിയിൽ ഗ്രൂപ്പ് എ ചാമ്പ്യൻമാരായ കേരളം രണ്ടാം സ്‌ഥാനക്കാരായ കർണാടകയെ നേരിടും. 28ന് രാത്രി 8 മണിക്കാണ് കേരളം- കർണാടക പോരാട്ടം.
ഗുജറാത്തിനെതിരായ നിർണായക മൽസരത്തിൽ ഏകപക്ഷീയമായ നാല് ഗോളുകൾക്ക് ജയിച്ചാണ് കർണാടക സെമിയിലെത്തിയത്. ചാമ്പ്യൻഷിപ്പിൽ രണ്ട് ജയവും ഒരു സമനിലയും ഒരു തോല്‍വിയുമായി ഏഴ് പോയിന്റ് സ്വന്തമാക്കിയ കര്‍ണാടക ഗോള്‍ ശരാശരിയുടെ അടിസ്‌ഥാനത്തിലാണ് സെമിക്ക് യോഗ്യത നേടിയത്.
മറുവശത്ത് ഗ്രൂപ്പ് ഘട്ടത്തില്‍ തോല്‍വി അറിയാതെയാണ് കേരളം സെമി ടിക്കറ്റ് നേടിയത്. മൂന്ന് ജയവും ഒരു സമനിലയുമാണ് ടീമിന്റെ ഇതുവരെയുള്ള സമ്പാദ്യം.
അതേസമയം ഏപ്രില്‍ 29ന് രാത്രി 8.00 മണിക്കാണ് രണ്ടാം സെമി അരങ്ങേറുക. പയ്യനാട് സ്‌റ്റേഡിയത്തില്‍ നടക്കുന്ന മൽസരത്തിൽ ഗ്രൂപ്പ് ബിയിലെ ഒന്നാം സ്‌ഥാനക്കാരായ മണിപ്പൂരും ഗ്രൂപ്പ് ബിയിലെ രണ്ടാം സ്‌ഥാനക്കാരായ വെസ്‌റ്റ് ബംഗാളും തമ്മില്‍ ഏറ്റുമുട്ടും. ഗ്രൂപ്പ് ഘട്ടത്തില്‍ മൂന്ന് ജയവും ഒരു തോല്‍വിയുമായി ഒമ്പത് പോയിന്റ് വീതം നേടിയാണ് ഇരു ടീമുകളും സെമിക്ക് യോഗ്യത നേടിയത്.
Most Read: ട്വിറ്റർ മസ്‌ക് ഏറ്റെടുക്കും; 44 ബില്യൺ ഡോളർ കരാറിന് അംഗീകാരം
