കെഎസ്ആര്ടിസി ഓര്ഡിനറി ബസുകള് ഇനി യാത്രക്കാര് ആവശ്യപ്പെടുന്ന സ്ഥലങ്ങളിലെല്ലാം നിര്ത്തുന്നു. ഇപ്പോള് നേരിടുന്ന സാമ്പത്തിക പ്രതിസന്ധി മറികടക്കുവാനാണ് പുതിയ പരിഷ്കാരങ്ങളുമായി കെഎസ്ആര്ടിസി എത്തുന്നത്. ഇതോടെ എവിടെ നിന്നു വേണമെങ്കിലും ഓര്ഡിനറി ബസുകളില് ഇനി കയറാം.
അണ്ലിമിറ്റഡ് ഓര്ഡിനറി സര്വീസ് എന്നാണ് ഇത് അറിയപ്പെടുക. ആദ്യഘട്ടത്തില് തെക്കന് ജില്ലകളില് മാത്രം നടപ്പിലാക്കുന്ന സര്വീസ്, ജീവനക്കാരില് നിന്നും പൊതു ജനങ്ങളില് നിന്നും അഭിപ്രായങ്ങള് തേടിയ ശേഷമായിരിക്കും നടപ്പാക്കുക. കെഎസ്ആര്ടിസിയെ ജനസൗഹൃദം ആക്കുന്നതിന്റെ ഭാഗമായാണ് നടപടി. സ്വകാര്യ ബസുകള് നിര്ത്തുന്ന സ്റ്റോപ്പുകളിലെല്ലാം ഓര്ഡിനറി ബസുകള് നിര്ത്തുന്നത് പരിഗണനയില് ഉണ്ടെന്നാണ് ഗതാഗത മന്ത്രി എ.കെ. ശശീന്ദ്രന് അറിയിച്ചത്.
ഇതുകൂടാതെ പ്രതിസന്ധിയെ നേരിടുവാന് കെഎസ്ആര്ടിസി പുതിയ പദ്ധതികള് പലതും ആസൂത്രണം ചെയ്തുവരികയാണ്. യാത്രക്കാരെ തീരെ കിട്ടാത്ത ഷെഡ്യൂളുകള് നഗരാതിര്ത്തിക്കു പുറത്തേക്കു മാറ്റി സ്റ്റേ സര്വീസുകളാക്കുക, ഇതിലെ ജീവനക്കാര്ക്ക് ഡിപ്പോയില് നിന്നുള്ള ദൂരം കണക്കാക്കി കിലോമീറ്ററിനു രണ്ടു രൂപ വീതം പ്രത്യേക അലവന്സ് നല്കും. ഇന്ധന ചെലവ് കുറക്കാന് നഷ്ടത്തിലുള്ള ഷെഡ്യുളുകള് പരമാവധി സ്റ്റേ സര്വീസുകളാക്കി മാറ്റുക. അഞ്ചു മാസത്തിനുള്ളില് എല്ലാ ബസുകളിലും ജിപിഎസ് ഘടിപ്പിക്കുക. ഡെബിറ്റ്- ക്രെഡിറ്റ് കാര്ഡുകള് ഉപയോഗിക്കുവാന് കഴിയുന്ന ടിക്കറ്റ് മെഷീനുകള് ബസുകളില് ഏര്പ്പെടുത്തുക തുടങ്ങിയവ അതില് ഉള്പ്പെടുന്നു.
