തിരുവനന്തപുരം: കോവിഡ് പ്രതിസന്ധിയില്‍ പൂട്ടിയ സംസ്ഥാനത്തെ ബാറുകളും ബീയര്‍, വൈന്‍ പാര്‍ലറുകളും തുറക്കുന്നതില്‍ തീരുമാനം ഉടന്‍. എക്‌സൈസ് വകുപ്പിന്റെ ശുപാര്‍ശയില്‍ സര്‍ക്കാര്‍ ഉടന്‍ തീരുമാനം എടുത്തേക്കും. അണ്‍ലോക്കിന്റെ ഭാഗമായി പല സംസ്ഥാനങ്ങളിലും ബാറുകള്‍ തുറന്ന സാഹചര്യത്തിലാണ് എക്‌സൈസ് വകുപ്പ് കേരളത്തിലും ഈ നിര്‍ദേശം മുന്നോട്ടുവെക്കുന്നത്.
എക്‌സൈസ് കമ്മീഷണറുടെ ശുപാര്‍ശ മുഖ്യമന്ത്രി പിണറായി വിജയന് കൈമാറി. എക്‌സൈസ് മന്ത്രി ടിപി രാമകൃഷ്ണന്റെ കുറിപ്പ് സഹിതമാണ് ശുപാര്‍ശ കൈമാറിയിട്ടുള്ളത്. ബാറുകള്‍ തുറക്കാന്‍ അനുമതി നല്‍കിയാലും ആരോഗ്യവകുപ്പിന്റെ കോവിഡ് മാനദണ്ഡങ്ങള്‍ പാലിച്ചായിരിക്കും പ്രവര്‍ത്തിക്കാന്‍ അനുവദിക്കുക. ബാര്‍ തുറക്കാന്‍ ബാറുടമകളും അനുമതി തേടിയിരുന്നു. ബാറുകള്‍ തുറക്കുന്നതില്‍ സി.പി.എം സംസ്ഥാന സെക്രട്ടറിയേറ്റും അനുകൂല നിലപാടാണ് സ്വീകരിച്ചത്.
തമിഴ്‌നാട്, കര്‍ണാടക തുടങ്ങിയ സംസ്ഥാനങ്ങളില്‍ അണ്‍ലോക്കിന്റെ ഭാഗമായി ബാറുകള്‍ തുറന്നു. എക്‌സൈസ് കമ്മീഷണറുടെ ശുപാര്‍ശയില്‍ കോവിഡ് പ്രോട്ടോക്കോള്‍ പാലിച്ച് ബാറുകള്‍ തുറക്കാന്‍ അനുമതി നല്‍കണം, ഒരു മേശയില്‍ രണ്ട് പെരെന്ന നിലയില്‍ ക്രമീകരിക്കണം, പാഴ്‌സല്‍ മദ്യവില്‍പ്പന അവസാനിപ്പിച്ച് ബിവറേജ് കോര്‍പ്പേറഷനിലുണ്ടാവുന്ന സാമ്പത്തിക നഷ്ടം പരിഹരിക്കാം തുടങ്ങിയ കാര്യങ്ങളാണ് പങ്ക് വെക്കുന്നത്. എക്‌സൈസ് വകുപ്പിന്റെ ശുപാര്‍ശയില്‍ ഈ ആഴ്‌ച തന്നെ തീരുമാനമുണ്ടാകും.
