ദുബായ്: നബിദിനം പ്രമാണിച്ച് യുഎഇയിൽ സെപ്‌തംബർ അഞ്ചിന് സ്വകാര്യ മേഖലയിലെ ജീവനക്കാർക്ക് പൊതു അവധി പ്രഖ്യാപിച്ചു. ഇത് വാരാന്ത്യ അവധിക്കൊപ്പം (ശനി, ഞായർ) മൂന്ന് ദിവസത്തെ നീണ്ട അവധിക്ക് വഴിയൊരുക്കും. നേരത്തെ, സർക്കാർ ജീവനക്കാർക്കും സെപ്‌തംബർ അഞ്ചിന് പൊതു അവധിയായി പ്രഖ്യാപിച്ചിരുന്നു.
ഷാർജയിലെ സർക്കാർ ജീവനക്കാർക്ക് വെള്ളിയാഴ്‌ച സാധാരണ അവധിയായതിനാൽ അവർക്കും ഇത് നീണ്ട വാരാന്ത്യമായി മാറും. റബി അൽ അവ്വൽ മാസപ്പിറവി കാണാത്തതിനെ തുടർന്നാണ് യുഎഇയിൽ സഫർ മാസം 30 ദിവസമായി കണക്കാക്കിയത്. അതിനാൽ ഹിജ്‌റ കലണ്ടറിലെ മൂന്നാം മാസം ഇന്നലെ ആരംഭിച്ചു. അതുകൊണ്ടാണ് റബി അൽ അവ്വൽ സെപ്‌തംബർ അഞ്ചിന് വരുന്നത്.
ഈവർഷം സൗദിയും യുഎഇയും ഒരേദിവസം നബിദിനം ആഘോഷിക്കുന്നില്ല. യുഎഇയേക്കാൾ ഒരുദിവസം മുമ്പാണ് സൗദി മാസപ്പിറവി കണ്ടത്. ചന്ദ്രന്റെ ചലനങ്ങളെ അടിസ്‌ഥാനമാക്കിയുള്ളതാണ് ഹിജ്‌റ കലണ്ടർ. ഓരോ മാസവും ആരംഭിക്കുന്നത് മാസപ്പിറവി കാണുന്നതിനെ ആശ്രയിച്ചാണ്. ഓരോ ഹിജ്‌റ മാസത്തിലെയും 29ആം ദിവസം യുഎഇയിലെ മാസപ്പിറവി കമ്മിറ്റി അടുത്ത ഇസ്‌ലാമിക മാസം പ്രഖ്യാപിക്കാൻ യോഗം ചേരാറുണ്ട്.
Most Read| കൗതുകമായി അഞ്ച് തലയുള്ള പന; 30 വർഷമായി സംരക്ഷിച്ച് നാട്ടുകാർ
