കോഴിക്കോട്: സമരം ഒത്തുതീർപ്പായെങ്കിലും ജീവനക്കാർ എത്താതിനെ തുടർന്ന് എയർ ഇന്ത്യ എക്‌സ്‌പ്രസ് സർവീസുകളിൽ പ്രതിസന്ധി തുടരുന്നു. കരിപ്പൂർ വിമാനത്താവളത്തിൽ നിന്ന് ഇന്നും നാളെയും പുറപ്പെടേണ്ട രണ്ടു വിമാനങ്ങൾ റദ്ദാക്കി.
ഇന്ന് രാത്രി 11.10ന് മസ്‌കത്തിലേക്ക് പുറപ്പെടേണ്ട വിമാനവും നാളെ രാവിലെ 9.35ന് ദോഹയിലേക്ക് പോകേണ്ട വിമാനവുമാണ് റദ്ദാക്കിയതെന്ന് കമ്പനി അറിയിച്ചു. ജീവനക്കാരുടെ സമരം ഒത്തുതീർപ്പാക്കിയെങ്കിലും വിമാന സർവീസുകൾ സാധാരണ രീതിയിലാകാൻ മതിയായ ജീവനക്കാർ ഹാജരാകാത്തതാണ് കാരണം. ഏതാനും ദിവസങ്ങൾക്കകം സർവീസുകൾ പൂർണതോതിലാകുമെന്ന് അധികൃതർ വ്യക്‌തമാക്കി.
സമരം മൂലം വിമാനത്താവളങ്ങൾക്ക് കോടികളുടെ നഷ്‌ടമാണ് ഉണ്ടായത്. വിവിധ വിമാനത്താവളങ്ങളിലായി ലക്ഷക്കണക്കിന് ആളുകളുടെ യാത്രയും മുടങ്ങി. അവധിക്ക് നാട്ടിൽ വന്ന പ്രവാസികൾക്ക് യഥാസമയം മടങ്ങാൻ സാധിക്കാതെ വന്നതോടെ ജോലി നഷ്‌ടപ്പെടുന്നത് ഉൾപ്പടെയുള്ള സാഹചര്യങ്ങൾ വേറെയും.
Most Read| സ്ളോവാക്യൻ പ്രധാനമന്ത്രി റോബർട്ട് ഫിക്കോയ്‌ക്ക് വെടിയേറ്റു
